ساعات تضياق تضياق و تكبس و تكبش في الخناق ..

ساعات تعكس تتسكر و تعطيك بالظهر و تدوان .. نحس روحيِّ فقدت البصر و الأسود هو كل الألوان .. النفس يرزن تڨول عالم متربع في رواريا ..

البدن تلون بالازرق ، توجعت عيوبو  بدات تبان

نسيت

نسيت وقتاش آخر حكيت ..و ڨداش نتمنى نتكلم

لكن في أول حرف نفشل و تسبقني دمعتي و نضطر نسكت ..

نسيت آخر مرة حكيت .. خاطرني انا ديماَ في دور المتقبل المستعمل الطبيب المحامي البنك الباندي الأم المرىَ .. متطوعه مع جيوش الأرض .. ضدي

فيفري برد ، شوية مطر و بالكاسح تقسم ڨلبي و تعبا الملح فالشطر ..

الطقس هذا يعجبني و هو اكيد فد مني .. عايشة في فرش يحتوي فياً بالدفا لكني ديماَ نتشكى من برد روحيِّ .. يطمن فياً لي هو ديما يستنى فيا لكني خاينتو بالخوف و في ليل مرات نصيح بﻻ صوت و نبكي بﻻ دموع و نسخن لين نذوب و نهرب و نجري نجري نجري و في ﻻخر نرجع من بديت في فرشي ندور .. كي الأرض السايبة بور ﻻ خضار ﻻ فﻻح ﻻ صوت عصافر ﻻ ثمار ..

كان الشمس ضاربة فيها في نهار و برود الثلج كاسيها في اليل ..

تشبهلي , و الريح تشتهي تهزها تدلوحها تشطحها تخربشها تريشها .. لكن هي ﻻ فروع ﻻ جذوع بورر بور بوور .

محتويني بين يديه مدفيني و مهنني و ڨلبي و مخي موش معاه .. نكتب على دفى يجري فالعروق على حضن بالنبض .. نفس و دم ، حضن يزيل الهم و الشمل بعدو يتلم ..

توحشت نضحك مع حد نحبو .. توحشت نحشم و نتلبك و ندخل في بعضي من غزرة .. توحشت نحير و نخمم فيه فاليل .. توحشت نحسب السويعات على موعد نحضرلو ايامات .. توحشت نقسم وقتي مع حد .. يخمم معايا يحزن يضحك ياكل يتغشش يلبس ينزع يجري يصيح يكتب يسب يضرب يغني و ينادي معايا ..

يقسم معايا ذاتي و صفاتي يسهر على جبيني بشفايفو يقيسلي سخانتي و يشربني دوايا يعرف سبب علتي و دايا .. توحشت نقسم هالدنيا الي مرزنا على كتافي بكل شيء الي يجي و

الي ما يجيش لحرام و الحﻻل و التنغنيغ الدﻻل ..

توحشت نحب شكلي و نرجع نتفقد وجهي و نخمم في تفاصيلي و تولي المرايا تعنيلي ..

ايه ڨداش مع الوقت كل شيء معادش عندو قيمه عندي .. يمكن .

ڨداش نحب نرجع نبكي و نصيح و نكسر و نغضب و نحكي و نحكي و ما نسكتش ..

السكوت طعمو مر .. السكوت بليس ساكن فال ڨرجومة ينهش الروح و يهد الحيل ..

ڨداش محتاجة نميل و نلڨى حيط ساندني ..

حيط .

الحال شتاء و البرد موش فرشي .. البرد في روحيِّ .