ليومة 04 أفريل 2015 ..طفيت ٱخر شمعة في عشرة عمرها سنين .. في عشرة خذات الماضي و الحاضر .. خذات مني اغلى حاجة عندي لي هي حياتي و طفولتي و مراهقتي و شبابي .. تي خذات عمري لي فات . اللي جاي ؟

لا لي جاي باش نعيش فيه انا وحدي .عشرة عمرها برشا سنين .. برشا ذكريات في ليل بوجتيعي نبات معشتش كيف البنات .. برشا محن و برشا فقر .. برشا فازات و كلام فهموه كان انا و هو .. تي هو الانتيم من نهار لي صرت نعرف و انا معرفتي سابقة وقتها ..هو الراجل الحزار لي ماخلانيش نعيش كيما البنات .. يمكن هو متغير لا يشعر ..

كنت نطبق كلامو حتا ماغير لا يقولو .. كان هم الراجل الوحيد لي كلامو يمشي عليا .. كنت نمشي معاه و قلبي مطمان حتا كان يشق بيا البرور و البحور ..كنت معاه العبد المؤمور .. و هو سلطان حياتي ..كبرنا مع الوقت و كبرت معاه هالعقلية ..و زاد عليه دلالي ليه .. هو يغلط و انا نرضيه ..هو يفسد و انا نصلح ..هو ينساني .. ينسا عيد ميلادي الي قبل بنهار نفكرو فيه .. ينسا شنية نوعية الماكلة لي نحبها .. ينسا قهوتي و سكرها و ينسا صحتي و اهميتها .. تي ينساني انا مرات ..هو ينسا و هو يتغشش خاطر انا مافكرتوش ..

ههه ولدي ..لي حبلت بيه مالدنيا ..ولدي لي هزيتو في جاشي سنين .. و نهار لي ولدتو .. دللتو و تاج راسي حطيتو ..ولدي الي طعامو من نومي و من صحتي ..
طعامو من لهوتي و خوفي و من حرصي على راحتو ..عشرة سنين ..

ناس كلها تعرفني نعشق التراب لي يمشي عليه .. تربيت و كبرت معاه .. كبرت على طبيعتو الصعيبة ..عندهم في سبرهم المرى ما تتكلمش ما تتحركش ما تلبسش ما تخرجش ما تحكمش ما تعملش ما تقررش ما تعيشش ..عندهم المرى ساق تاع فرش و الا فاز تاع نوار فيه الما ماغير نوار ..

و انا بنية مصعصعة .. تمشيش عليا هاللغة .. و بدات العروكات و اللطخ عالحيوط .. بدينا في نحي اذيكا علاه اذاكا و شكون شاورت و متمشيش و ما تجيش و ما تعمليش .. و ما تعيشيش .بدينا في انت نيبة عيب لي تخممي فيه .. ما لازمش مخك هكا ..عيب تخالطي العزرة ..عيب تعملي هكا.عيب تلبسي هكا ..عيب تحكي مع فولان و علان ..و نحنا مجرد صحاب .. في سما كبرت على هالقوانين لي ما تدخلش لراسي الناشف ..صباح و ليل و نهار و في الدار و في الشارع و في كل بقعة العرك هو حياتنا ..عرك كلو غيرة مني و منوو .. غيرة مفضووحة .. و خلق الدنيا كلها يعرفوني نحبو و هو اكا سي كازانوفا لي يحبوه بنات العرب الكل ..

لكن يدور و يرجعلي .. يبكيلي يشكيلي من ضيقتو يبكيلي .. على وجيعتها يحكيلي .. يحكيلي قداش موش مواتيتو و فد منها و لازمو يبدل بينية جديدة و بالطبيعة انا مديرة الاعمال .. حياتي كلها ٱنسق في علاقاتو الفاشلة و نقول تو يكبر و يعقل .. ت ماهو الا راجل ..تي سيدهم رجال الدنيا و تاجي المرصع ياقوت و ألماس ..

ههه تعداو 8 سنين و نحنا على نف الحال لين تصيغ في دمي هالمخلوق .. كي يدي و كي قلبي و كي وجهي .. كي عيوني .. مانجمهاش هالدنيا بلا به ..بدات الدنا تصعب و بدات طموحاتو تغلبو . بدا يهمل فيا ..

ٱٱ نسيت ما قتلكمش لي هو يحبني ههه تي اي يحبني ليه و معاه .. موش معاه وحدو .. لا لا مع البناويت لخرين زادة .. حب امتلاك .. تي حب استلاء .. ههه شقولكم في هالنوعية تاع الانانية ..خليتو يعيش .. تي مقتلكمش راو ضنايا .. راو ولدي و كبدي .. تي ايه عفت على كرامتي و شخصيتي و قوتي و جباروتي و مبتدئي و كل كل شيئ و قلت خليه يعيش .. عاد انا سايي وصلت لمرحلة حياتي مليانة بيه .. عنديش فضا لراجل ٱخر .. مهما كان هو ..كل مرة تختلف الاسامي .. من سعاد ل نورس ل عليا ل رنيم ل سوسن ل رحمة ل نونو ل فدوة ل ...و الاسامي انواع و الخلائق اشكال .. و الافعال .. اخلاق ..و انا ؟ لا انا الكل في الكل هههانا لي نداوي لجراح و لي ندفي الصدر الموجوع ..

انا لي نسمع الاحداث و نعطي رايي في الخيانات اناهية لي قامت بدورها خير ..انا الام الحنينة لي لا تغضب لا توجججع ..انا المتروكة لوقت الغصرة ..انا الطبيب ااشافي ..و القلب الحنين الدافي ..

...و في يوم .. كانت الحالة غير عادية .. سكر واضح من الصوت ..قلي عندي ما نقلك و لازمك تعاونني .. "كان انت تفهميني كان انت تحسيني ..":-" منعرفش كيفاش .. و الله غصب عليا .. "

-"شصااااار .. شعملت "

-"سمحيني يا فاطمه و الله لا نقصد "

-" تي احكي .. فجعتني عليك شبيك "

-" اصلا انت سبب .. انت دللتيني و خليتيني على راحتي .. انت لي عمرك لا كبستيني .. انت السبب و انا موش غالط .. لكن بالله سامحنيني"

-" يا ولدي انطق اش عملت من عملة و شدخلني انا ؟"

-" بالله ما تبعديش عليا منغيرك معنديش حتا حد .. منغيرك نضيع .. تي و الله نهبل "

-" الصبببببرررررر ليك يا الله باش تحكي و الا باش نعلق "

...

-" .... (يبكي) ... نحبها "

-"هههههههههههههههههههههه تي مخيبك فجعتني نستخايل اش جرالك .. تي وقتا باش تكبر و تيزي من تفدليكك تي كل شيئ تحبو انت ههههه "

-" تي و الله نحبها .. نعرفش اش صار المرة هاذي تعلقت بيها .. حبيتها . . منجمتش نبعد .. نحبها .. "

-" شكون .. شنية .. شبيك ما فهمتكش "

-" الطفلة لي خبيتها عليك عندي شهرين معاها .. حبيتها يا فاطمه .. و الله نحبها .. سكنت قلبي .. تي قلبي كنتي فيه كان انت و امي .. لخرين منحبهمش .. لكن نعرفش اش صار حبيتهااا"

تخنقت .. ريتوه الاكسيجان لي نتنفسوه ؟ انا حسيتو كربون و الا صديوم و الا سم و لا كوليرا .. موش عارفة بظبط .

-" سامحيني بالله و ما تبعديش عليا .. منغيرك نموت .. انت حياتي و ذكرياتي و معاك كبرت و صرت راجل .. انت المرا متاعي .. و الله نحبك "

-" كل شيئ نجمو نتحكمو فيه الا قلبنا شكون يحب .. باهي ما تبكيش .. هي تحبك ؟ "

-" ايه تحبني "

-" باهي خليك معاها و انا هاني معاك ^^ .. انت ولدي منخليكش .. و القلب ما يحكمو كان ربي "

و الله تعداو ستة اشهر بعد الحكاية هاذي و انا لتوة عايشة على نفس الموال .."هي نحبها و انت حياتي و من غيرك نموت .."و انا ؟ انا المعتوهة ..لكن الحكاية كبرت و بديت انا نخرج على برا و بدات بقعتي تضياق .. جيت ليومة و قلت يزي .عييت و نطقت

نطقت .. قلت راني عييت بالظلم تعميت و من الانانية تذليت ..يزي ما سمعت و ريت .. يزي ما عانيت ..يزي لازمك تفيق لي انت كليتلي عمري .. ورا حياتك لي ما ثمرتش و اول ما شافت عيوبك ما صبرتش و كيف التفشة رماتك و مرحمتش .. هذي موش فاطمة لي انت تجرح و هي الداوي ..هي موش فاطمه لي قلبها فيه الرحمة على حساب راحتها ..في الوقت لي فات عطيتك رقبتي عفس عليها باش تعليت ..ليومة قررت .. نخرجك من حياتي و نخليك تخلص الفاتورات المنسية ..يا عشر عمري .

((واقعي موش خيال ))