أَ تونس .. نهون عليك تخليّ ناسك يكرهوني فيك و يلبسوني حزام ناسف نقسم روحي طروف تنطق جواجية لي تعبات بكلام و صياح سكتوُّ فيا بالخوف ؟

أَ الولاّدة كيفاش تخلينيٍ بعد لا ليالي في البرد و المطر حتى السخانه و الجوع و المرض آدربّت جريت تضربت تجرحت تمرمدت نار و ما و ثلج و غاز و كرطوش .. درّبت و في صحتي عطيت و وحدي في الظلمة بكيت و جريت و جريت و جريت و توحشت امي و ريحتها ستفقدت فرشي الدافي و تصبيحة في سهرية مع حبيبي و لبسة مزيانه ..

توحشت نرقد في راحة مني و نقوم على صوت راديو كوجينت امي .. موش نقوم على صفاّر انذار حان وقت العمل البس تكبس راسك ارفع حييّ العلم و القي النشيد و ثبت مليح فالعلم خاطر هو نفسو كفنك لي في اللفة يغطيك و قبل الحفرة يخليك .. وحدك وحدك

أَ تونس نا عطيتك عمري شبابي و صحتي و راحت بالي و انتٍ بعد لا دفنتيني خليتي بابا و امي فرجة للي مايسواش يلوجو على حقي يجرو ما يلقو .. نا عطيتك الي ما بعدو عطاء و انتي

خسرتي عليا العلم غطاء ؟

لبست كسورتك و سخنت كتافي بسلاحك حامي تراكنك و مخارجك و مداخلك .. عمري لا طلبت منك شيء اما كي عطيتك كبدت امي و عيون بابا شكون بيهم توة ؟ عو انا جا لبالي انت ا تونس بعد العالي .. نا نحميك و انت تمحيني ؟

ي وخياني تحبو على الثروات و الخيرات و الفلوس و الكراسي و العفن الكل ؟ ميسالش نادي ولاد البلاد يقلعوهااا منين نبتت و لفوهااا الكل في فلايجكم و هزوها و امشو و خلولها أرض بوووور قاحلة توة الرجال تعاود تنبتها رود

أَ تونس مالقيتش طريق يوصلني للمدرسة المطر برشا و العشة طاحت على امي و بابا و دفنتهم .. خويا الكبير هج للعاصمة يخدم بعد لا تخرج يخدم عند رجل العمايل الي هو ماقراش .. لكن عندو كرسي في الدولة  ..

ملقيتش لا دوى للسخانه لا لبسة للبرد لا ماكلة للجوع لا حيوووط تلمني .. لين جاني عمي قلي خوذ كول البس و اجا بحذانا ندفو على النار لي باش تحرق الطواغيت .. مشيت و اول ليلة نرقد و ما نخمم في شيء كرشي شبعانه و الجثة مدفيا موش عريانه و الحيط لي المتكي عليه ما خلاهاش بيا .. يرحم ولديه طلع احن عليا منك ا تونس و رحمني من تفكيري فيك و خلاني بالشوية ننكر فيك و النار شعلت في جاشي و فهمت لي لازمني ندافع علي وكلني .. نا كالكلب حبيت لي يحبني و غرست سناني في الي خلاني ..

لبست تزينت و الشريطة في حزامي علقت .. كاهو ربي اولى بيا بيك .. موش ستنيتك برشا و ما غزرتيليش ؟ هاني جيتك

العاصمة و الطواغيت هي الوجه الاخيرة .. الله اكبر هي الحل هكا فهمني الراجل لي كسف طيشتيني لمني ..

هاني جيتك نا ا تونس كي انت ماشيتينش تخافي من ريفنا جهلنا و خمجنا و لهجتنا و لبستنا المقطعه و نا و حناني و الكبادة  الكسرة و الرفيسة و حليب الشاه .. الشيء هذا ما يروقش بيك

هاو تنضمت تزينت تلونت حجمت و الحزام المزيق لبست و جيتك نكافيك على فعلك السابق  ..

سارحة في شارع طويل جا لبالي خويا لي يخدم في تونس و بني عمي الي اكتشفت لي هو طاغوت يحمي في تونس و جا لبالي نبوسهم قبل لا ينطق ما في خصري .. لكن معاش وقت الراحة فالجنة تستنى فيا امي و بابا لي دقنتهم العشة يستنو فيا نجيهم نضيفه لابسة شبعانه نطمنهم عليا ..

نغزر للسما نلوج في منين نبدى وقفت قدام بنيا كبيرة ..

قلت :" ا تونس انتٍ سبب "  و من بعدها نطقت جواجيا و معادش حاسة لا بروحي للي داير بيا ممكن وقتها متت و الا طرت يظهرلي تشتت .. تخلط دمي بهمي و بدموعي بصوتي " أ توووووونس " ..

عاد قتكم بالحديث ماهي اكا البنيا طلع يخدم فيها خويا و يحرس فيها الطاغوت لي هو بن عمي لي لبس الكسوة لتونس  ..

باهي كيفاش توة ا تونس متنا جميع !

انت توة لا تدري عليا و لا علي بيا خويا و بن عمي و نا كلنا طرنا في سماك .. مدام دين سماك ما على بالك كي تخلى كي تتصرقع كي تتعمر كي تخلى ..

تمشيش تتغغششي عليا أ تونس وخيتي ماني جيتك و طردتيني في الخبى رميتيني ماني جيتك قتيلي ارجعي منين جيتي ي جبور ي خامج ي جاهل .. متغشيش حبيت حتى انا نلبس كي خويا اما ميسالش عند ربي لحساب ..

حبتك و جيتك .. هو انا ممكن كان جا عدنا طريق كياس و ضو و ما و مدرسة و كار و عطار و كتب و حتى حيوط تلمني راني تثقفت و فهمت الي عمي الراجل الي وكلني غر بيا و مشيت برجليا لخويا و بن عمي باش نفتتهم نقتلهم نمحيهم ..

هاني سكتت اما غير قوليلي علاش أ تونس ماحبيّتينيش ؟