سعات تقعد قدام شباك تحط كاس قهوة و تقعد تتفرج في لعباد ماشين جايين ..

ولي يخدم ولي يحوس ولي تقضي .. تحط ايدك على خدك و تفكر شوي ..

تقول علاش و احنا نعرفو لي دنيا فانية و ماكلين عليها رواحنا؟ علاش دنيا فانية و مصيرنا دود و تراب و تشهقوا ما نلحقوا؟

علاش نحبو و نكرهو و احنا بش يجي نهار كل حد يشد ثنيتو؟ علاش نسبو و نذمو و احنا منقلبوش السب لرواحنا؟ شبينا انانيين؟

نخممو كان في تو .. و بعد كيفاش؟ زعمة بش دوم هالوجيعة؟ ولا غصرة و تتعدا؟ زعمة نوصل للي نحب ولا نموت في الثنية؟

زعمة نخلص باول شهرية ولا تضربني كرهبة في ثنية؟ علاش نشري كراهب و ديار و دبش؟

و منشريش كفن و نحضر القبر لي فيه بش نتفرش؟ زعمة علاش منكملوش مع بعضنا؟ ولا مكتوب موش بش يجمعنا؟

زعمة علاش و علاش و علاش؟ والله الأسئلة ما توفاش ....