كل واحد فينا لازم باش تجيه بريوود يضعف فيها و يفقد الامل و حياتو تتحول ظلام .. فما الي ينجم يشد صحيح و يتعداها بكل سهول الفترة هاكي .. و فما الي حياتو تاقف غادي و مايلقاش حل كل مايجي يقدم خطوة لازم يرجع عشرة لتالي …

نتصور اني مالنوعية الثانية .. عندي اكثر مالاربعة شهور و اني حابسة في نفس البقعة ! .. تقول في حبس مانجمتش نخرج منو .. كل مانقول هاني لقيت ثنية الهروب و نحاول نهرب منو نطلع غالطة و نزيد نضيع .. ضايعة في كل شيء : في احاسيسي .. معاش نعرف نحس و معادش فاهمة روحي فاش نحس غش مخلط بحزن و بكره و برشاحاجات .. حتى افكاري مشتت .. ضيعت روحي و مالقيتهاش .. ويني ؟ وين مشات ؟ وين باش نعاود نلقاها و كيفاش ؟ .. و زعمة باش نلقاها و نرجع ؟

قعدت كان الكتيبة هي الحاجة الوحيدة الي مونستني و مصبرتني على الحالة الي وصلتها ..

الكتيبة تنسيني في لحضة الي اني في هاك الحبس الاظلم و تخرجني منو ..