كل واحد فينا لازم باش تجيه بريوود يضعف فيها و يفقد الامل و حياتو تتحول ظلام .. فما الي ينجم يشد صحيح و يتعداها بكل سهول الفترة هاكي .. و فما الي حياتو تاقف غادي و مايلقاش حل كل مايجي يقدم خطوة لازم يرجع عشرة لتالي …

نتصور اني مالنوعية الثانية .. عندي اكثر مالاربعة شهور و اني حابسة في نفس البقعة ! .. تقول في حبس مانجمتش نخرج منو .. كل مانقول هاني لقيت ثنية الهروب و نحاول نهرب منو نطلع غالطة و نزيد نضيع .. ضايعة في كل شيء : في احاسيسي .. معاش نعرف نحس و معادش فاهمة روحي فاش نحس غش مخلط بحزن و بكره و برشاحاجات .. حتى افكاري مشتت .. ضيعت روحي و مالقيتهاش .. ويني ؟ وين مشات ؟ وين باش نعاود نلقاها و كيفاش ؟ .. و زعمة باش نلقاها و نرجع ؟

شاهية نكلمك.. شاهية نجيك و نبوسك على خدك..

شبيك خليتني ريت مخيبك كي هنت عليك

تي إيجا يا .. إيجا راني مشتاڨة لتعنيقة من عندك.. متوحشة نحط راسي على كتفك و نقرب لرقبتك و نتنفسك و نقلك محلا ريحتك ..

كل ليلة نحط راسي مع موزيكتي البنينة و نتخيلك و نبكيك.. و كل صباح يجهرني الضو و نرجع نلوج على خيالك بين الثنايا يا روح الرووح ..