قد ما تحب و باقي شوية ، ما  فماش حب بزايد و إلا إنسان كثرلها مالمشاعر  ممكن فما طرف أخطأ التقدير  و قلبها إستغلال . الحب كشعور ديما باهي و لا فيه إفراط و لا تفريط خاطر بالأساس   مختلف و كل واحد كيفاش يعيشو و يعبر عليه . الحب هو قدرة على العطاء بلا حدود  ، لا حدود فكرية و لا غيرها ، و بما أن الحب قيمة إنسانية نبيلة ما ينجمش نلغيوه في حضور  مبدأ مهم برشا إلي هو المساواة و إنصاف المرأة .

في بدايات التأثر بالحركات النسوية و بسيمون دو بوفوار و نوال السعداوي وغيرهم تنسى الحب و العطاء و ممكن يهزك التيار شوية للثورة "على شرق السبايا و التكايا و البخور " حسب نزار قباني إلي يجدد دعوته مرات أخرى و يقول "ثوري " . لحقيقة إيمانك بالمساواة و القضايا الكونية العادلة ما يلزمش يجردك مالحب أساسا و مالعطاء كإمرأة و كإنسان ...

الإشكال تطرح و يتطرح كل ما تكون امرأة تعدي ساعات و أكثر في الكوجينة   تصنف و فرحانة لكن في المقابل تأمن بالمساواة هو في الحقيقة عمرو ما كان خلاف لولا إنو المجتمع يحب يلقالك تصنيف بين انك تكون امرأة و سيدة منزل و تصنف وتدلل عائلتك و إلا ناجحة و تأمن بالمساواة يعني ما تنجمش تجمع بين رغباتك و نجاحاتك و قدرتك على الحب و العطاء و تكريس برشا وقت من حياتك باش تحب شريكك و عائلتك خاطر التطييب و غيرو عمرو ما كان فرض إجتماعي أما هو رغبة ، و موش كان التصنيف هو زادا الوسيلة الوحيدة باش تعبر بيها على مشاعرك كيما الراجل موش الهدية هي الطريقة الوحيدة إلي يعبر بيها على حبو و تقديرو لشريكتو.