- سامحني بابا.. حبيت نلقى منك اثتين.. نسيت لي الباهي في الدنيا متاع مرة موش مرتين و اللحظة لي تتعدا لازم تمحيها في رمشة عين، نتفكر كي كنت تقلي نوارتي ما نعطيكش للي يجي و نهارة عرسك نفرشلك بالورد جنينة تخليك أميرة باش يعرف لي اختارك أمير و يحطك في عينيه..

سامحني في لحظة نسيت كلامك و اخترت لي رماني بدموعي واحزاني و لي ستنيتو حتى نشف الريق و مالقيتو لي فرحني نهارين و استنيتو سنين سامحني خسايلتو كيفك طلعت انا لي كيفك..

حريتي، ناديتها و لم تجب..

أميمتي، استنجدتها و قد اختفت..

أبي، أشتاقك رجائي عد..

وطني، أحبك رغم المرض.

فلترقصي سيدتي!

على جثث أساطير الكذب !

على نار الفراق و الغدر!

على زمن الحب و ماشابه!

كانت غيبوبة ووفات ، غصرة و تعدات.. كنت نبكي و نقول وقتاش نفيق؟ خاتر كنت نعرف لي موت الدنيا نجم بعدو نعيش! نحكي على موت الوجيعة لي لا يداويه لا فرملي و لا طبيب، نحكي على غصة كبيرة تخنق القلب و تجفف الريق،

فيقتني يا امي بكلامك.. قتلي عمرك بين ايديك و أحلى أيامات تستنى فيك مازلت تحب تشد بيتك و الدموع تجري من عينيك؟ قتلي يا بنيتي ما تسد عليك كان قرايتك و رضاية والديك، قتلي ما تبكيش علي غدرك قدام عينيك ، الدنيا قصيرة و فيسع تدور باش توريه نفس الويل!

قتلوك يا بلادي.. قالوا يحبوك و من شعبك جردوك.. قالوا يعزوك و في عيدك غدروك، إي نعم قتلوك.. علاش ظلموك؟ علاش حرقوك؟ كنت الخضراء و بين البلدان تتعالى، قتلولك إسمك و جاو في الدفينة القتالة، قتلوك يا بلادي..

الإرهاب كبير و حبنا لتونس أكبر.. الخطر كبير أما الشعب يحضر ، كبير و صغير لترابنا حامين، العينين تدمع و مازلنا واقفين.. الخوف من ربي مش من عبد بسلاحو، الخوف من ربي موش ملي يبدل في حراموا..