ڨالوا عاڨر
Raja Ben Mabrouk - رجاء بن مبروكعاڨر ڨالوا عاڨر وما تضناش
ڨعدانها عندك خسارة
و علاه يا ولد الناس
هو أنا ماكينة و إلا بڨرة ك تطيح تكثر سكاكينها
ڨولي يا مرا ياللي في وڨت الشدة كنت سندك
ووڨت مرضك ضمدت جرحك
يا خي معنديش ڨيمة كان بالضنا ؟
ڨالوا عاڨر و ما تضناش
والحب ما يورثش إسم العيلة
نحبوا صغير يجري في الحوش
نحبوا إسموا عالذهب منڨوش
ولد فلان
بوه من عيلة كبيرة
ايه ايه تفهموا فيا ؟
ڨلك عيلة كبيرة
الإسم العالي و المربط الخالي هاذي هيا
ڨالوا شجرة ما تثمرش في سبرنا تتڨص و عروڨها بالنار تتحرڨ
حكمتوا عليا
ودفنتوني
و كأس المر رشفة رشفة سڨيتوني
هموم الدنيا حملتوني
وبكلام السو وديتوني
و أنا اللي في الشدة واسيت
وفي الغصرة كنت حيط
وڨفت راجل وسط الرجالة
و حسدوني عليك يا راجل النساوين
ڨالوا زين و عين
و في القضية مرا مڨدية
و لوحتوني
بلا سبب
لا بسبب
عذر واهي
إعتراض منكم عالعدالة الإلاهية
شمت فيا الڨريب و البعيد
و سمعت كلام موذي
واحد يڨول لبابا بنتي جابت و ڨلبي باهي
و لخرا تطيش في ضناها في حجري
عنڨي شمي ريحة الملايكة ك إنتي محرومة
بلعت كلامهم و غصيت
غصيت و بكيت بسكات
و حطيت على ڨلبي حجر صم
و في الليل نتوسد مخدتي و بهمومي نشكيلها
ڨالوا عاڨر و ما تضناش
و تبدلت في عينيهم الخزرة ليا
و هزيت حمل ثڨيل على صغر سني
كبرت في ليلة و نهار خمسين سنا
ڨالوا عاڨر و رموني بسهام الشر
و غطسوني في بحور #هم
ڨالولك لوحها
و سمعت كلامهم
و جريت وراهم
و في المحكمة وڨفتني
سيدي القاضي ڨولا علاه بش يطلڨني
سكت ما جاوبتاش
تكلم و الا لسانك تعڨد
ڨول راهو ڨالولي عاڨر و ما تضناش و ما تلزمناش
سيدي القاضي
أحكم بعدل
و ميزان العدل في بلادنا مايل هاذيا جهلتها و ما عرفتهاش
و حكمت المحكمة لصالحي
ڨلي المحامي ربحنا القضية
ربحناها
طلڨناك
و ربحوا هما طلڨوني
و ربح هو ڨص أطراف الشجرة
و بعينيهم و بكلامهم المرزي حرڨوني
و عرڨ بعد عرڨ ڨتلوني
ربحنا القضية
. و عندك شهرية
و هبوط لاباس
لاباس يا بنت الناس
جارية المرا في آخر الحكاية
جارية شريتوني و طيشتوني
ڨلتوا عاڨر و ما تضناش
و الكلام الدوني سمعتوني
غدوة ناڨف على سويڨاتي
و العرڨ اللي حرڨتوه تحت الرماد خلف جمر
و الجمر يحرڨكم
غدوة نلم جروحي و نڨوم للدنيا
و ڨولوا عاڨر
ايه عاڨر و لا نجيب لها الدنيا غشير يڨتلني
عاڨر هاذي حكمة ربي
أما ڨبل ما نخرج
نحب نبشركم
ميزان العدل مايل لكفة الظلم
و الرجولية صوردي منڨوب
و الرحمة تڨطعت من ڨلوب الناس
و ڨولوا عاڨر ما نضناش
خير برشا ما يڨولوا جابت صغير لا دليناه لا مرا لا راجل
رجاء بن مبروك
Website Design Brisbane