تجيك بريود ،كل شيئ ضدك ،عايلتك ،اصحابك وحتى اقرب الناس ليك .

تجيك بريود تلقى روحك وحدك ،هايمة ،تحس بوجيعة عمال و تزيد ،تحس بخنقة عمال وتقوى وانت كالغريق لي شاد في قشة .

تجيك بريود كل شيئ يدور عليك ،تعكسك و تضربك الحيوط من كل شيرة ،طيح وتقوم ،طيح وتعاود تقوم ،هاك طحت ،تكسرت ومعاد فاها ما يتصلح ،ميسالش ما يدوم حال مش هكا يقولو .
مالا قوم ،قوم سكر كل شيئ ،نحي عليك كل شيئ ،حتى من تبسيمتك لي هوما لبسوهالك ،

اغزر لروحك في مراية ، اخزر لروحك لبدنك لكل تفصيل فيك ،ركز ،ما تخزر  كان لتصويرتك لي هوما لبسوهالك ،رد بالك تبكي  ،دموعك أحصرها ماتهلكش التصويرة .

وتو تذكرت ،تذكرت كي كنتو ،كنتو راسين في شاشية ،زناقي لمدينة و لحية جدي لي يحبها ، تذكرت جاريانكم وصياحكم لي مالي لمدينة ،تذكرت القهوة الكحلة و المشموم لمزين بيه

،تذكرت نجوم ليل هاذي ليا وهاذي ليك ،نسمة البحر و الڤمرة لي مزينة بيه .

هاك تذكرت ،شنوة تبدل ،نهار ورا نهار وإنت واقفة في نفس لبلاصة ،نفس ثنية لي تهز هيا بيدها لي تجيب،ومخدتك لي شاهدة على دموع لياليك ،ومبعد هاك ستنيت،وقيت ،ٱقف لروحك ،أصنع ضحكتك بيديك ، نحي عليك كروبة لكحلة وبالمونيكير زين ايديك وتذكر في نهار كي قلك لمرا لي تحب لحمر ،هي مرا حرة ،إستفزازية و نرجسية ..مالا حبي روحك وبالاحمر هبلييه .