نحبك ونعشق والديك ،نحبك ونحب روحك ويلعن بو اللي يحبك ،يتمناك ويحلم بيك ،نحبك

و نحب غزرتك الڤاتلة لي تمرمدني،تبعثرني وترميني في قاع البير ،نحبك ونحب شعرك

المسرسب لي منجمش نغمضش عيني كي نشمو ،اكحل لليل كي ضلام ليليا بلا بيك ،نحبك

ونحسد بوسة الخال لي في خدك ونحسد روحي عليك كي نراك فايقة صباح وانت تخبي في

غشك عليا ومني ،نحبك ونحب غشك وانت تتوعدي بش تقاطعيني ومتنجميش ،نحبك

ونعشق غيرتك لي تخليك كالرعد تخوف اما تغدرش ،نساية ،نحبك وانت نساية ،تفھميني

وقت ضحكتي و وقت غشي و بكايا وقت اطيح بيا الدنيا ومنلقى كان كتفك لحنين نتكى عليه

،نحبك ونحب ،نحب نراك تشطحيلي على نغمات متواتيش اما بيك تولي احلى ،نحبك ،نحب

ريحتك البنينة لي فيھا نغطس ومنشبعش ،نحبك وقت تشدي لكتاب وتبدي تشمي فيه عينيك

يتغمضو تتبسمي وتبان اكا بوسة الخال و آه من اكا بوسة الخال تدوخني تبعثرني تقتلني

وتعاود تحييني من اول جديد ،نحبك كي تبدي

تحكيلي على نھارك والتنھيدة سابقتك وانا غرامي بيك وليك سابقني .نحبك ،نحب روحك

لخفيفة ،ڤلبك لكبير نحبك بهبالك ،بدلالك ،بدمك البارد بكذبك وتبهنيسك ، وصوتك لحنين وقت تقومي الصباح مكوخرة تقريلي اللي كتبتيه في الليل

،وانا كلامك مخمور بيه ومنجمش نبعد عليه ،نحبك ونحب بوستك كل صباح بين الخدين مرصوصة

،تضحكي وتقلي وراسك اخر مرة ،نحبك ونحب الروبة الكحلة عليك واللون الاكحل ميليق

كان بيك ،نْحِبّك وقت تْقُلّي سكّرْلي السلسلة و ما إِنجّمش نْشِدّ روحي بِش نَطْبع بوسة في

رقْبتِك و نْولّي نِسْئلِك بَعْد كُلّ لِبسة"ھھه، بِش نْسكّرْلِك السلسلة و لا لا"نحبك كي تغار تتوعد

تصيح وصياحك يبعثرني ونقلك " و رَاس اليوم إلِّي جْمع بيني و بينِك، ما يَحْلالي حدّ

غيرِك"

تي ماللخر نحبك و يلعن بو حبك..