يحبني ليه، أما ديمة يخليني وحدي... يحبني ليه، و هو مش ليا و ما يحبش يكون ليا وحدي...

يلومني أما ما يحبنيش نلومو... يحاسبني و ما يخلينيش ولا حتى يسمحلي بش نعمل معاه نفس الشيئ...

يغيب... كيف ما يحب، قد ما يحب و وقت ما يحب، و كي نغيب، يحاسبني... و يتذمر... ما يحبش...

يهمملني، و يتغشش كي نهمملو و ما نتلهاش بيه و بتفاصيلو....

شنوة إنجم نسميه هذا ؟!!

هكا الإنصاف ؟! و هكا العدالة ؟!

ولا نسميه غرور...

مش أنا اللي متعودة نقسم و نرضى بنص الحاجة... مش أنا اللي مستانسة نصبر، و مش أنا اللي مستانسة نطيح من روحي و نرضى باللي يصير و نسكت...

توجعت... توجعت برشا ... خاطر مش منجمة نحكي و نتكلم... خاطر كل حاجة في بالي مش منجمة نقولها...

غصة كبيرة...

برشا حاجات... برشا حاجات حاستها و نحب نقولها... نخرجها من روحي و قلبي..  أما لا... ما عملتهاش... و ما نجمش نعملها...

ضعف ؟؟

حتى روحي مانيش فاهمة...

تعبت...

كثرت الأحداث و جات و تلمدت الكل مع بعضها...

و بقيت أنا اللي علي اللوم في كل مرة و كي كل مرة...

طغات علي الوجيعة... على بدني الكل...

نحب، أما ما نجمش...

مش منجمة نهرب... نبعد...

ع البعد و الفراق مش قادرة... ولا حتى مستعدة... ما نجمش خاطر شتكون فما ديمة حاجة ناقصة و بلاصتها فارغة...

ساعات البعد ينسي و ساعات يتعب...

و كيفاه نبعد و ننسى ؟... ما نجمش...

خاطر برشا حاجات مش مخليتني و مانعتني...

نحب نبقى و نقلك " إنتي زادة... ما تمشيش... توحشتك... متوحشتك... أبقى... إرجع... و خليك... "

نلقى روحي متورطة بيك، مهبولة بيك...

و انتي ؟!

انتي خايب... ما تحسش... ما يقلقكش غيابي... ولا حتى يهمك حضوري... ما يأثرش فيك البعد...

سلاحك لسانك... لسانك اللي يغزل الحرير... بيه تتفنن و بيه اتطمع...

ما تغيرش... أما تهبل خاطرك تكره شكون يمسلك ولا حتى يقربلك من حاجتك ..

ما تخافش من الفراق...

و ما تحبنيش... أما تحب حبي ليك...