يا عاشڨْ لعْيونْ
Hiba Hamdi - هبة حمدييا عاشڨْ لعْيونْ
يا راشڨْ في الجْفونْ
يا شاڨّ الصحرا و البْحَارْ
يا شاربْ الخمرا و المْرَارْ
يا مْتبّع اللّمعة و الغمزة
يا سارحْ في الضّحكَة و الرّجفَة
يا خاينْ كل نساء الكونْ
كل يوم تبدل الشّونْ
يا عاشڨْ لعيونْ
***
يللّي تِحلمْ بكحلِة لَهدابْ و عَسْلِةْ الخَزْرَة
و تُشْعُرْ في خْضُوريّةْ عْيونْها السّمْرا
عْيونْ الڨَمْرَة
يلّي ضايعْ تْدُورْ ما بين انثى و انثى
الاسم ضايعْ اما عيونها ما تَنسى
وحدة واسْعة كِالبيرْ غارْڨَة
وحدة ناعْسة بالحبْ حالْمة
وحدة مْخدّرَة تايْهة و حايْرة
وحدة قويّة كالصڨْر شاعْلة
وحدة غايْرة لِلحُسْد مايْلة
واللي عيُونْها نمريّة صعيبة و ڨاسية
و مولات عْيون لَغْزال ضحكة و دْلالْ ..
و مازِلْت تْلوّجْ
و اتّبّع في اللّون و الشّكل
فيهم ضاع العڨْل
***
ٱه يا عَاشِڨْ لعْيُونْ
يا مجنونْ ..
ما تهونْ ..
اِمْتَى تڨُومْ من هبالِك
راك في الغريڨْ تعُوم ..
ڨالولِك النجومْ اڨربلِك ..
شِعْرِك ڨَتّالْ و كْلامِك مَسْمُومْ
امتى اتُّوبْ ؟
ياما كليتْ و عانيتْ
و بسكّينِك غَصّيتْ
عْضامِكْ تكسّرِتْ و بِالضّرب تهرّيتْ ..
ورا الصّْبايا ،
جريتْ.. و حفيتْ
و لا تعبتْ و لا مليتْ
الجُرحْ و را الجُرحْ و مِالغَصْرَة فدّيتْ
و من جْواجِيكْ عَيِّطِتْ : عْيِيتٓ .. عْيِيتْ
و خُنْتْ.. و غْدَرْتْ.. كيمَا خَانوكْ
و الذِّل ورُّوكْ
و المْرَارْ ذوّڨُوكْ
حتّى ولاّت الوْجوهْ تِتْعاوِدْ
و عْيونْهُم سيوفة تِتْمادِدْ
و بالجْرُوحْ اتعوَّدْت و الوْجيعَة هيّ هيّ
امّا ڨَلبِك برِدْ ..
و الدّم فيهْ جمِدْ ..
حتّى دڨّاتو خِفْتِتْ ..
و رَعْشاتُو تِعْبِتْ ..
و انتِ باڨِي منْ دُورَة لْدُورَة
ما ضاعِتْ منّك الصّورَة
تْلوّجْ في العِينِين
اللي تاهِتْ منّك من عَشْرَة سْنِينْ
و ما رِيتْ في غِيرْها هَاكْ الزينْ
***
و تِتْفكّرْ عَمّ الدَّرويشْ
الّي علْمِك تْعِيشْ
في صُغْرِكْ ڨَالِّكْ : " يا غِشِّيرْ
ما تجرّب عِشْڨْ العْيُونْ
بيهم تَصْبَحْ مجنُونْ
وتصِيرْ حيَاتِكْ جْهَنِّمْ
و عَبْدْ لِيهُمْ تْكُونْ "
هبة حمدي
Website Design Brisbane