يا ربي خليها
Amira A - أميرة ع.نبدا نفدلك، نضحك و نحكي
في لحضة نحس فما حاجة خانقتني
فما غصة في قلبي شادتني
فما حاجة في مخي مقلقتني
فما حكاية في داخلي متعبتني
نقول تي شبيني هكا مسكرتها
شبيني ديما منكدتها
تي كمل اضحك و ازهى يا معقدتها
ياخي فما عملة خايبة عاملتها
ولا مشكلة عاطفية عايشتها
ولا زعما خاطر قرايتو حاربتها
لا واللهي سافا و اموري الكل مسلكتها
تي مالا هالحكاية شنيا
شنيا هالحاجة الي مغلبة عليا
ااااهه..
يا ريتها كانت مشكلة عاطفية
يا ريتها كانت حاجة اخرى عاملة فيا
يا ليتها ما كانت اميمتي مشكلتي هاذيا
خوفي على امي هو المنكد عليا
مرضها هو الي عامل فيها و فيا
السرطان شاد فيها و يحب يبعدها عليا
السرطان يحب يحرمني من حبها و حنانها عليا
السرطان يحب يحرمني من صوتها، ريحتها و طلتها عليا
السرطان غلب علاها و عليا
يا ربي نحيه منها و حطو فيا
يا ربي اشفيها و فرج علاها و عليا
يا ربي خليها و ما تناحاها عليا
يا ربي راهي اميمتي اكثر حاجة غالية عليا
يا ربي راهي هي نور عينيا
يا ربي راني ما نجمش نعيش و هي بعيدة عليا
يا ربي..
أميرة ع
Website Design Brisbane