في بلاد الامن و الاستقرار في بلاد المرا الحرة صاحبة الفم الحار في بلاد الثقافة ، النقاش و الحوار في بلاد الديمقراطية اللي فيها كالراجل كالمرا .. مساواة عدل حقوق و حريات ، جيش أمن حرس وطني ديوانة شرطة مرور تطلب و تنول الكلهم لخدمة الوطن متجندين و منهم زادة المواطنين يخاف عالبلاد و مايعطيهاش و لو كان يتلز يعطيك عينيه و يقعد بلاش اما امو ماتراهاش .. يقلك تونس أمي اللي حماتني و رباتني اللي جابتني رضعتني و كبرتني

تونس زينة و عزيزة ، تونس المدينة العربي ، تونس السيدة ، تونس جامع الزيتونة ، تونس سيدي بوسعيد ، تونس سوسة القنطاوي ، تونس الحمامات و نابل ، تونس من بنزرت لبن قردان ..
تسمعوا لحمك يقشعر و عينيك تدمع ، تحبها و ماريتهاش ، تحلم بيها و مامشيتلهاش ، تخزر عاليمين عاليسار و ماتلقهاش. تقوم تهز valisek و تعطي على ساقيك

جايك يا تونس جايك يا الخضراء جايك يا أمي يا غالية يا للات الغاليين ...

و تجي ..

في المطار يعgروك و شطر دبشك يعطوك ، توقف تاكسي يقلك استنى ساعة خويا لوين '' سامحني صاحبي موقف stop ؟؟؟ و تقول مايهمناش زينها مازلنا ماريناش تعيش فيها و تعاشر ناسها صغارها و كبارها و تشوف .. تشوف الخو كيبيع خوه و مايبكي الصغير على بوه . تشوف الأم تبيع فصغيرها و تقلهم خلصوني بالأورو . تشوف العم و الخال يتعدى على بنت أختو و البو يتاجر ببنتو . تشوف البنية اللي عمرها تسعة سنين اغتصبها شيخ الستين ، تشد راااسك تغمض عينيك و تقول احنا وين ..! تعطيهم بظهرك و تاخو اليمين .

ترى الديواني يعدي السلاح و يقبض بالدولار

ترى البوليسي يسفر لسوريا و الراس على مليار

شرطة المرور تلقاه مايحكي كان بلغة خميس و عشور ..

تزيد تقدم تتفرج في اللي باع بلادو و فرط فأولادو ناس تقول مرهونين و ناس تقول مخطوفين و ناس تقول في جربة مطيشين و برا لوج الحقيقة وين وينك يا سفيان و نذير ، تتصدم تتشوكا تشد راسك راسك راسك .. يجيك من تالي يقلك لا لا إعلام العار ، اي هاو دخل لكل دار ؟؟!!!

باهي سامحني خويا وينوا طريق المطار ؟؟؟