وينو بابا
Hana - هناء
كانت ديما تتمنى تنادي يا بابا وتسمعو يجوابها شبي بنتي يسالها على نهارها كيفاش تعدى و شنوة عطاتهم المعلمة و تحط راسها على كتفو و تحكيلو كيفاش حلت مسألة الحساب اول وحدة و المعلمة شكرتها قدام اصحابها ,
كانت تتمنى نهارتخرج معه وتشدلو يدو و تقول للعباد الكل اللي هذا بابا كانت ديما تسمع اندادها بابا شرانا بابا جابنا هي تقول احنا ماما جابتنا ماما شراتنا و تروح للدار بغصتها, كبرت البنية و كبرت معها غصتها
وتعلمت تشد دمعتها وقت كل وحدة من صاحباتها تبدى تستنى في بوها باش يجي يرواح بها من الليسي هي حفظت الثنية وفهمت اللي بوها مش باش يجي يرواح بها خاطروا لاهي في حاجات اخرى وفهمت زاد اللي يلزمها كيفاش تعمل على روحها
.كانت الكبيرة في خواتها,ثلاث بنات قاعدة تكبر و الام تشفق ما تلحق و البو موش هوني مش عارف بناتو وين وصلو,قداش ولاو عمارهم توا ,ماكلين,جيعانين,مكسين ,هوا لاهي بحاجات اخري, يقوم الصباح يطلب الفلوس هاتلي عشرة ولا حتى خمسة الاف , مايهمنيش منين تجيبهم, دبر راسك,
تخرج المسكينة كل مرة تتسالفلو من حد و تمدهملو باش يمشي يشرب بيهم و يشيخ روحو يرجع يروحلهم في عقاب الليل ,يطلب العشا و كان مافماشي لحمة و لاحوتة يولي يدورها صياح و ضرب لين يفيقو الجيران ,منهم اللي يضحك,منهم اللي يستلطف ومنهم اللي يدق الباب و يعمل روحو يهديه "راك في الخمسين و بناتك قاعدة تكبر ولاو صبايا بطلو و يزيك ما ذاليت روحك و ذاليت صغارك معك و مرتك الله اعلم بحالها" وهوكيفما كل مرة لاحياة لمن تنادي.
زادت كبرت البنية و خذات الباك فرحت و فرحت امها معها و مشات للفاك هذا الكل و بوها مش معها و هي التوة تستنى باش يجي يشدلها يدها اما عرفت اللي مش باش يجي النهار هذا و اللي لازمها تكمل الطريق اللي وصلتهولها امها اللي لعبت دور البو و الام ختارت باش تكمل وحدها الطريق و نتسى اللي بوها موجود,تنسى اللي باش يشدلها يدها ,خترت باش تكمل حتى توصل و تعوض لامها و تعوض لروحها
هناء
.
Website Design Brisbane