وما كلمنيش
Fayrouz Saïdi - فيروز السعيديقعدت نستنا فيه باش يكلمني
قلبي موجوع وعينيا تغرغر بالدموع
ما تبكيش يا بنتي شد روحك وما تبكيش
شيقولوا عليك الناس!
عينهم عليك
و انتي مخك عندو وقلبك مابين ايديك
يفرفط كي لحوتة لي خرجت مالماء
خبي دموعك و ما تبكيش
تو يكلمك ما تخافش تو يكلمك
هذاك الصبر يحب يعلمك
ومن مرار البعد يذوقك...
لا يشويني ومن كاس الهم لا يسقيني
وقتاش يكلمني يطفيلي ناري ويداويني
نحب نسمع صوتوا راني توحشتو
ومن قلبي عمري لا خرجتو
ومن بالي عمري لا طيشتو
ومن عيني عمري لا طيحتو
توحشتو قد الدنيا
وهو مطفيني
ناسيني وعلى جنب حياتو متكيني
لا يتحير لا يتفكر
وأنا
أنا دوب يغيب عليا عيني بالدموع تقطر
نحب نبوسو
نخبيه في صدري ونعنقو مابين ايديا
بعدو شواني وحرقلي قلبي وجوجيا
ما نحبوش يبعد عليا
حتى درج حتى دقيقة حتى ثانية
وحتى رمشة عين ما يغيب على عينيا
نحب نراه صباح و عشية وفي كل ثنية
نستنا فيه باش يكلمني وعلى أحوالو يطمني
زعمة شصارلو لمغبون شبيه نساني وما تفكرني
زعمة رقد! ماو قالي دوب ما يروح يكلمني
زعمة تاعب!
زعمة موجوع !
زعمة مشا في طريق ما فيه رجوع!
يضهرشي كرهني ونساني ومن حياتو محاني!
اصبر شوية فيروز تو يكلمك!
ما عادش عندي صبر ودموعي!
دموعي هبطوا وما عادش نجم لعينيا نرجعهم
شبيهم هبطوا ياخي ما عندهمش صبر
حالتهم متعبة أعظم من همي
ما ينجموش يعاونني حتى شوية
يشدو رواحهم لين نبعد ونخبي عينيا
ورا الباب ولا حتى مابين ايديا
النهار راح والليل طاح
والناس لكل رقدوا
وأنا قعدت وحدي منسية
نمشي نشد فرشي؟
ولا نقعد نستنا ونعد في النجوم!
مسحت دموعي
وترميت في أول جراية عرضتني
نستنا ونخمم
لين هزني النوم
قمت في الصباح مفجوعة
يا ربي شضيعت
شنوا لي صارلي البارح زعمة شنية!
قلبي يفرفت وعينيا منفوخة وراسي يوجع فيا
هزيت راسي ريت فالمرايا بنية
نعرفها وتعرفني وعينيها في عينيا
كينها تبكيلي وتترجى فيا
تي هذيكا أنا يا أنا
موش وحدة عرضتك مرة في ثنية !
ما عقلتش روحي وتبدلت عليا
قداشني موجوعة والمرار خارج من جواجيا
بردت وما عاد عيني في شي
لا بكى لا نواح لا نوم لا قهوة في عقاب عشية
بعد شوية تفكرت
تفكرت لي أنا كنت نستنا فيه باش يكلمني
ليل كامل نستنا...
وما كلمنيش .
بقلم فيروز السعيدي
Website Design Brisbane