وقتـاش

Syrine Khlifi - سيرين خليفي

هز حكاياتك و دور في خيالاتك ..

و اختار بالوحدة حلماتك ..

احلم و زيد احلم و اصنع شيخاتك !

و عيش الدنيا كيما هي ..

لا تخدم مخك برشا و لا تعيش بالنية ..

لا تسلم و لا تاقف نهار في وسط الثنية

و لوج على روحك بين ايامك المنسية ..

هز حكاياتك و نجماتك الي تحسبهم كل ليلة بعيد عليا ..

خليك وين انتي ..

ارحمني و سيبلي النفس شوية !

هز كلماتك و حديثك و ترهويجاتك و سكراتك في عز الليالي الي نساتك ،

شكون وقت دارت الدنيا حملاتك و على ظهرها هزاتك و في ايامك السودة ونساتك !

دواتلك جروحاتك ..

هز وجايعك و ابعد عالمرا الي ياماا معاك صبرت ..

و كي انتي ستحقيتها حضرت ..

و من حديث لحديث نسيت الي عملت ..

هز عينيك ..

هز للرب ايديك

و هز حديثك و ارجع لاماليك

هز عليها الحمل راهو ثقل

و مبعد العذاب الي عاشت و الذل

و التعب و الليالي و الظهر تفتل

هز الي خليتو

و خلي الي النهار ما حبيتو

و كذبت كي قلت ما نسيتو

مبعد ما مشيت و بين الذيوبة لقيتو ..

وقتاش سألت و وقتاش من عينيهم حميت؟

وقتاش خبيتو عندك في عز البرد و دفيتو ...

قعدت تغزر من بعيد تعيط و نديتو ..

اما المرة هذي صعيب يجاوبك .

صعيب يرجع و يعاود يطاوعك ..

تي وقتاش ؟

وقتاش تهز وجايعك

و تبدل طبايعك .. و تصلح من فعايلك ..

وقتاش ؟

سيرين خليفي

Website Design Brisbane