31 اوت 2013

6 جانفي 2016

858 يوم.. 1.234.140 دقيقة

برشا ايامات على فراقك

برشا دقايق على هدراتك

برشا وحش لحكاياتك

برشا حسرة عالوقت اللي عديتهولنا بسكاتك..

و برشا وجاعة و قهرة و نقمة عالدنيا اللي خذاتك

و برشا رحمة على روحك من ملايكة السماء اللي حماتك و بجناحاتها غطاتك..

نتفكر تلفون في الصباح.. فيقني من نومي و قالي راهو مشا.قبل ما يطلب السماح و يخلي صوت القلوب بعدو صياح..

تصدمت. لا بكيت و لاضحكت.. علقت.. الله و اكبر .. انا لله و انا اليه راجعون

... هبطني التاكسي بعيدة شويا عالدار..

دارك.. الدار اللي عديت فيها اكثرمن شطر عمري

الدار اللي حبيت في كولوارها

و اللي كليت في كوجينتها

واللي رقدت في بيوتهت .. في فروشاتها و على بناكها و على كل شبر من ارضيتها..

اللي قضيت حاجاتي في بيت راحتها و اللي تلميت انا و صاحباتي و لعبنا في سطحها..

----

صوت القران خايب و يخوف.. الكراسي قدام الدار..

قدام باب الدار .. و في البلاصة اللي توقف فيها موطورك و نخرجلك انا و ناخو من عندك الخبز.. نقصد ال5 باقات و في الشتاء كيلو مادالينا..

منظم انت يا بابا عزيزي.. 5 باقات و كيلو مادالينا..

نبوسك و انت تنحي في الكاسكا

نبوسك ماللحية اللي تدق

اللحية البيضا اللي زينها الشيب

-عزيزي الله يعينك

-الله يهنيك عيش بنتي نحي الخبز مالفيلا ( ساشي )

ندخل.. علمتني انحي الباقات السخونة مالفيلا بش ما تعرقش و تولي ماعادش بنينة.. بنينة كيفك.. كيف قلبك..

--

مازلت قدام الباب.. نشوف في الكراسي شادين بلاصة موطورك.. نشوف في برشا ناس وصوت القران خايب و يخوف..

عرضني خالي ماريتوش.. راجل خالتي ما ريتوش و راجل خالتي لاخر كيف كيف.. ما ريت حد..

دخلت و عرضوني برشا وجوه ذابلة و عينين دامعة..

حملتني خالتي و قتلي عزيزك مات و طفات نار طيبتو الحامية .. ماكنتش بش نبكي.. مازلت دايخة.. مافاهمة شيء اما غلبتني دموعي.. نتفكر صوتي.. نتفكر بدني اللي فشل و نتفكر

شهقاتي.. نتفكر الوجاعة اللي حسيتها و نتفكر غزارة دمعاتي.. بكيت لين فشلت..بعد دارت بيا امي و خالاتي.. برشا ناس.. نسيت.. هذا الكل صاير في الكولوار اللي حبيت فيه و انا صغيرة

و مشيت فيه و انا كبيرة.. و في بلاصة الطاولة اللي كنت نحط عليه ال5باقات و انحاهم مالفيلا كيما علمتني..

اما هزوها الطاولة.. هزوها .. بش يفرغوا البلاصة للناس.. الناس اللي جايا لموتك..

برشا ناس و صوت القران قوى في وذنيا

برشا ناس و صوت القران خايب و يخوف..

دخلت للصالة.. وين انت راقد.. وين انت متكي.. وين انت قاعد..وين انت تاكل..وين انت تشرب..وين انت تعارك.. وين انت تتفرج في العربية و الجزيرةة و اخبار الثمانية.. وين ندخل ناخو مهبتي

في العيد.. وين بنكك و الطاولة اللي قدامو .. وين ريحتك..وين كحتك..وين صوتك..وين قوتك و جبروتك..

اما اليوم .. حتى شيء من هاذم.. انت اليوم فيها مسبول و مخلي القلب مبتور ..

ماشومها كلمة مسبول .. اما سامحني بابا عزيزي ما نتفكرش ريتك قبل فارش و راقد في القاعة.. و مفرغ البيت..

--

دايرين بيك برشا ناس و برشا وجوه .. دخلت بجمبك و انت مغطينلك وجهك عليا..

علاش تغطيولو في وجهوا ؟ علاش مستخسرين شويا سوايع فيا.. نشبع بيه قبل ما تهزوه عليا؟ فماش ماتبرد شويا النار اللي لاهبة في جواجيا؟

علاش هكا؟في اما شرع و اما دين .. وجه الميت يتغطا؟

-------

قالولي عريلوا وجهوا و بوسوا.. عريتلك وجهك و بستك...

عريتلك وجهك و بستك يا بابا عزيزي.. اخر بوسة...

______________