و وصّيتك
Malek Boudhina - ملاك بوذينةو نوصّيك ..
اللّي بيني و بينك أكثر مالهواء ..
و أخفّ مالنفس ..
أبعد مالسماء !
و أدقّ مالقلب كي يتجسّ ..
بيني و بينك دنيا ..
كواكب ..
أرض ..
عالم ..
مجرّة ..
نجوم و سماء و ڨمرة ..
بيناتنا جهنّم و جنّة ..
و نوصّيك ..
بش ما تجيش ..
و لا تزيد تخبّل المخبّل ..
و لا تدخل فيّا بالتبربيش ..
و حتّى بش تغرّقني و تغرق فيّا ما تزيدش ..
و كان بش تقعد تحكيلي كلام ..
تسرقلي حلمة و تتفكّرني كان في المنام ..
أقعد ما تجيش ..
نحبّ اللي يفعل ما تحكيش !! ..
إيجا و ما تستنّانيش ..
و أحياني خلّيني نعيش ..
نوصّيك ..
سكّر بابك كان خمّمت نهار نحِجّلِك ..
نخَجّلِك ..
نحاجّجك ..
نخُجّلِك ..
و إلاّ حتّى نخجّجِك ..
نتعبّد بريحتك ..
نتيمّم بصوتك ..
و إلاّ حتّى نصوم على شوفتك ..
بلّجو ..
خوذ نفس منّي ..
و أرجع سكّر قلبك و ثلّجوا ..
نوّصيك ..
عليّا ما تثيّقني ..
و كبّش في سمايا كان نهار نطقتلك "أعتقني" ..
و كان نهار هربت منّك ؛ ليك هرّبني ..
و اجري اجري و لشوني إسبقني ..
و نوصّيك ..
تِكتبلي ..
تكتبني ..
و منّي تجبدني ..
تحسب معايا و تحسبلي ..
قدّاش من نجمة في السماء تترا ..
و "شحال" قلبك يضوى كي الظلام علينا يطغى ..
و تحكيلي ..
تحكيلي أش تحكيلك الدنيا ..
و تحفّظني خطاويك و تعدّيني على ثناياك ثنيّة ثنيّة ..
تسكّنني في تراتش عروقك و تعيّطلي "بيّة" ..
و تضيّعني فيك و وسطي تتخبّى عليّا ..
و تقلّي شبيك و نقلّك "إنتي اللّي بِيّا" ..
نوصّيك ..
تكونلي برّ الملايكة المنجوسة ..
برّ الملبّسينها الكفن و مسمّينها عروسة ..
برّ الصوت اللّي يتعنّق و الريحة الملموسة ..
تكونلي هاك اللّي يسمّيوها في سبرنا "حوسة" ..
و نوصّيك ..
تغنّيلي ..
تعلّمني نحيالك قبل ما نَحْيالي ..
و تِشكلّي الحروف و انتي تكتبلي ..
و بقلبك عينّيا تقرالي ..
و عينيك ماللّيل للّيل تفاضيلي ..
خاطرني نحبّ نعوم ..
نحب نسنّس روحي على غيرك نصوم ..
و انا الغشّيرة بنت العامين و يوم ..
نوّصيك ؟ ..
دوم ! .. و إلا مغير ما تخمّم في حواشيّا تحوم ..
و وصّيتك ..
ملاك بوذينة
Website Design Brisbane