هي ، هي ، هي ..

الي تقول كلمة زايدة و تتطلب السماح الي تضرب و تعنق الي تسبك و تحملك الي تعارك و تبوس الي تقرص و تضحك .. إلي تفددك بالكلام و التخرنين و الهبال ، ساعات تحسك بالأمان و ساعات تخليك غاطس في برشا تخمام .. الحنينة الي بكلمة بنينة تضحك و تنسى كل وجيعة .. الذكية الي تسحرلك جنونك و تخليك هايم بين الوديان لين تغريك و تزيد تضيعك بين الأكوان .. القوية مولات القلب البلار : صافي يشعل كي الشمعة و يحب يحرق النوار .. مولات الكلام العسل و الضحكة الفضيحة في عز فرحة صغيرة .. مولات الكلام المرزي و الغزرة الي تسم  البدن كي تتشل م الغيرة و الا من الغش على حاجة كبيرة .. الي تخمم بقلبها و مسكتة مخها و وقت تتحط بين نارين تغمض عينين البحرين و تضحك ضحكة المنتصرين خاطر تعرف إلي يحب ينجم يضحي حتى كي يبدى يحكي مع عزرائيل  .. هي الي تغفر و تسامح خاطر مخها مزين بالياسمين و فاهم كعبات فلفول بالسكر فاوحين فوق بحر كرمال ذايبين مخلط ببرشا منك و منها الاثنين