هربت لبعيد
Rim Wrak - ريم ورقو مخيبني كي تظلام الدنيا قدامي و نترزى فيك و فأحلامي
مخيبني كي نكره كلامي
صغري و شبابي
مخيبني كي نتوحشك ومخيبك كي تڤسى و تدوان
كي تمشي و نتوحش معاك الدنيا و الألوان
و اغصان الشجرة المكسرة
ضلوعي المهرسة
مخيبني و مخيبنا
و يا سي مشومنا و مكبر دايا و داك
و محلا القعدة حذاك
محلاني كي نراني فيك
و مخيبها رواية
و شكون قال وفات الحكاية
و نحب عينيك على حيطي مرايا
خدك ياسمينة و عرجون تمر وألف حكاية
و بوسة عليها خطار
وانتي بيدك الحل و مفتاح المخزن وانتي اختار
جحا و المسمار
و مخيبني كي تظلام الدنيا
و نخرج على ضو الڤمرة نهوم
لا منخافش مالغول
اما نخاف مالوحش لي قتل الجحش و خرج في زنازتو و بتعنيقتو مفرحش
و الشمعة و الفتيلة
و نرى خيالك في كل شيرة و تركينة
لمتاش تخليني عندك رهينة
و نشعلك صوابعي شمع و وقيد
احكم بأحكامك و ڤودني و زيد ڤيد
و العصفورة فلتت مالإيد
ماعاد تراها
هربت لبعيد
و مخيبني بلا بيك و النهار نهار عيد
و انتي عند ربي الفوق بعيد
نجمة في سمايا تضوي و ماتغيب
و البنية و عروستها عليك رقيب
شعرة فالراس كحلة ماتشيب
ريم ورق
Website Design Brisbane