هذي أنا. ما نحبش تعرفوني أما نحبكم تحسوا بيا. إسمي ما يهمش أما أنا بنية في العشرينات. أنا الفرحة على وجهي بضحكتي للناس أما الوجيعة إلي في قلبي ما تتحكاش. وجيعتي موش غدرة مالقريب ولا خيانة الحبيب .

في هالدنيا هذي حاجتين ما يشاوروش كي يزوروك " الموت والمرض ". أنا مريضة ومرضتي قتلتني بالحياة وما نفع فيا حتى دواء . أنا معاناة بنية تونسية بغدرة من مرض ما يفيد فيه شيء. باش يمشي في بالكم المرض الخايب. لا موش صحيح . مرض هذا يجي في المخ وجيعتو في القلب أكثر منو .

كلاني على صغر سني غدرني وهدلي حلمي . بكاني وعبالي عينيا دموع صحت مالوجيعة وصوتي ماهو مسموع .

أنا إلي تراني ديما نضحك فالنهار و ليلي كلو بكى.

أنا إلي تراني تقول محلاها هالطفلة وأنا كارها روحي .

أنا إلي يراني يقول صحة ليها كل شيء ليديها يجيها وأنا ما حليلي شيء .

أنا إلي يحزدوني حتى على محبت الناس ليا وأنا حاسة الناس بكلها بعيدة عليا.

أنا إلي نتوجع ومنقولش كان ليلي خالقني وليه نشكي .

أنا إلي نعاني ونبكي .

أنا ليا عشير وحب في حياتي أما ما نجمش نشكيلو ونبكيلو كل ما نتوجع خاطر باش يفد ويفيض كاس صبرو عليا وحملان شكوتي ومعادش يلوج عليا .

أنا إلي كي نرى الناس الدايرة بيا إلي يحبوني وإلي يكرهوني كان جاو يعرفوا  إلي بيا راهم يعانقوا ويبوسوا فيا. أما خياروش البشر ساكت خاطر ما يحس بوجيعتك كان ميمتك وبوك  وربي إلي مالفوق.

خليني نقلكم باش تزيدوا تقراو حياتي ونقسمها معكم وإلي يقرا كلمة حلوة كاينو راكم .