نِتمنّاك ..

نِتمنّاك ..... صديقة ... موش برشا تي حتّى دقيقة ، تِتحمّلني و تلصِّق معايا التصويرة اللي شقّيناها ، رميناها غبَنّها و دفناها و خبيناها ،.. نردّوها ! نردوها و نصلحوها ، نزينوها ، ننفضوا عيها الغبار و نَرمِيوْ كفنها بعيييد .. بعييد ..
نِتمناك بعد كل غلطة تعرف الحقيقه ..

تِمِّن اللي عروقي تعباّت و في كل بلاصة زُرّيقة و تِفهم اللي ابتسامتي العريضة ولاّت ضيقة و اللي حياتي ولاّت كيف الشّوليقة ..

نتمناك تِفهمني و تِتفهّمني و تحكي لروحك بالسياسة و تخليها تكلّمني ..

نتمنّاك تِهمِسلي بين الفيقة و الفيقة و كيف نِسرَح تسمّعني موسيقى ..

و حتى لوكان وضعيتي محتاجة تَقريقة تلميحة و تلحليحة ، ماتحسِّسنيش اللي انا مَرضة مرجَة و لِلكُره عُرضَة ..

نِتمناك تعرف اللي انا نبكي 5 مرّات في الشّهر ، ماتعرفهمش ، ولا ممكن تعرف منهم الرّبُع ولا الشّطَر ..

- واحِد : عمري مكفِّن و حُرّيتي ضايعة مايعة مهدورة و في حفرة مطمورة مكسورة و عمرها لا باش تكون مَجبورة .. أهفِت ، ريض ، راك طفلة راك حرّة دُرّة ، سَرّة موش ضَرّة .. تي منين حُرّة بهالدّمعة الحَرّة و العيشة المُرّة ..
غنّي، اشطح، طير، حلّق، زيّن ،تمرِّد ، اصنع سينما في مخك ، جرّب ، أنشر، بِث ، صدِّر، أحلِم و حقِّق ..

- إثنين : أميرة في بيت زوجي ، زوجي الحبيب خُذ بيدي الي الجنّة ، هِزني منّا رُدني مِنّا مرغِدني مِنّا ألتَخنِي مِنّا ، حطِّمني و أوجعلي قلبي .. و إنتِ لِلاَّ !.. مرا راك لازمك تَكبر و تقرا و تِخدِم و تعرِّس و تجيب ولَيِد .. ايه ايه وليِد مالا وليّد باش يكبر و يخالط اولاد و كيف يِتنَرفِز سي الشباب يسِبِّلهم امهم، امهم اي ، امهم  اللي كيفك كيفها ..

عرِّس و تهرِّس و حياتِك لغيرك كَرِّس ، عرِّس اما مالازمِكش تطَلِّق .. مالا مرا راك !

- أربعة : تخَلويضِك ، تُخمامِك ، تشويش مخِّك،  الجنازة اللي عاملتها في راسك كل ليلة كيف تضلام الدنيا ..هي راو في الحقيقة ما تِضلامِش ، إنتِ تطفّيلها القمرة و الغمرة و الجَمرة و تعيش كان في هاك الطّمرة بين ذكريات قديمة بالية ، تاقِف عالأطلال .. تخاف .. جَبانة .. ايه ايه جَبانة ..

لا لا موش صحيح اللي خاف ماسلِمش .. يكذبوا عليك .. كون كيف الفارس المِغوار ، واجه، تقدّم خطوة ثنين،  خمسة يكفي ، شِد الصحيح و زيد علِّق خُمسة ..

- خمسة: هم السابقون و نحنُ اللاّحِقون .. اما انتِ ماتموتِش ، ماتكونش كيفهم ، ماتحُطّش كفَن ابيَض ، حُطّوا مزيَّن ، زينو بالسّينما اللي صنعتها في مخك والاّ بالتصويرة اللي لصّقتها من جديد .. و لاّ بتصاوُر جدد تحِبهم .. ورد و ياسمين اسم غلّة مسميينهولِك ولا خُضرَة تحِبها ولا فُلّة و لا عروسة مِزيانة و بَريئة ..

حُط موسيقى نهار عِرسِك .. ااا سامحني نقصد نهار جنازتِك .. موتة سَعيدة و بلِيدة ..

نعم ؟؟؟

لا ماسمعتِكش !!!!

ااا نومرو ثلاثة !!!

احيييت ، نومرو 3 هو إنت

نحكيلك المَرّة الجايّة