...وسعات كِيكثر عليّا الشّي ومانلقى شَيْ ندور نلوّج!! نلوّج في مكتوبي, نلوّج بين إيديّا قدّام عينيّا بين الثّنايا وراء الخطايا

.نلوّج نلقاش بسمة في العتمة وإلّا في الشّتيمة محبّة; نلوّج على ضحكة ترجّع فيّا الرّوح وبسرها نبوح ٱتْداويني من توّا بالبارح ومن غدوة بأوت البارح

.نلوّج نلقاش في السّكات نغمة : تونّسني تشيّخني تحمل خيالي لبعيد وبعيد وكِنْضيع ما تْرجعني تزيد تهزني لين نغفى في حضن السّكتة

نلوّج نلقاش في الظّلام شمعة : تضوّيلي ليلي تحميني تنوّرلي عيني نْشوف بيها الثّْنيّة مِستويّة رغملّي كحلة نمشي فيها مِقدِيّة وما نخاف من السّواد نور الشّمعة دليلي

نلوّج نلقاش في الخيال صورة : ترجّعلي صغري مْممم مَبنْها الطّفولة.. و صوت آي صوت يدخل من وذني يسري في بدني غناية ترويلي عروقي بال دو وال راي وال مي.. وال صول تضربلي أوتاري ترعشلي عظامي وترقصلي أفكاري و نخرّج مقطوعة من خيالي.

نلوّج نلقاش في الجوع أفكاري: تشنّجني تلخبطني و تشوّشني تهزني بكلّي و كلالي وترميني في هاوية تخلّيني نهز ونصبط ونستنبط و مصارن جوعي تتلخبط نولّي نحاول ونزيد نحاول لين نشبع ونشبّع ونتشبّع.

و بعد...!! نِتفكّر.. ليوم و غدوة وبعد غدوة

وكيما سرقت نغمة من السّكات ولقيت الثّنيّة في الظّلام وعملت حرّية من الخيال وفي جوعي كليت أفكار .. كِيكثر عليّا الشّي وما نلقى شَيْ نرجع نخلق من حتّى شي

كل شي ونصنع ليوم بش نحلم غدوة