"نحّيت الحيرة و الخوف و جرات الأيام..

حلّيت كتابي و قريت و لقيت حروف

حكاية مطروزة بالصوف ، تدفي لأيتام .."

... نسمع في YUMA و نتفكر فأياماتنا و كي كنّا يتامى و تبنّينا بعضنا ... كي حلّينا الكتاب مع بعضنا و بديناها حرف حرف و بدات معاه حكايتنا المغزولة بالصوف اللي تدفي الرّوح ...

" ليا سنيييين " مشى في بالي ليا سنين انت الغالي انت لحنين ، تبعت ثواني و توا لوين ، شقيت بوابي و ماني حزين ، خليت فني لقلبي قريب و القرب شواني خلاني بعيد .. "

كل كلمة ليك و كل نغمة تحكي عليك .. حتى الموزيكا ولات ملازمتني تذكرني فيك .. في شعرك و عينيك .. غزرتك و مشيتك و كل بوسة خالة مرشومة في بدنك و هاك الوشمة اللي في زندك .. عروق يديك اللي ياما ريت حبّي يسري فيهم .. صوتك لحنين الدافي ، و انفاسك اللاهبة كي قلبك العاشق الهايم الضايع في زناقي حكايتنا ..

حكايتنا المغزولة بالصوف ... تتفكّر ؟؟

و إلا نفكرك أنا !!

تتفكر ؟ بوسة الصباح أوّل ما تراني ..

و كي تنساها و تعمل بلعاني ..

و بعد بوردة ترضّيني و نقلك أخطاني ..

و تقلي كان ناخوش بوستي و ما نراش ضحكتك نعدي نهاري نعاني ..

تتفكّر ؟؟

بلاصة صوابعك على بدني كل دقيقة تحرقني ..

ارجعلي و حط يدك على بدني و طفي الحريق اللي شعلتوو ..

جيب الوردة و رضّيني ، خليك بجنبي و هنيني ، عنّقني و دفّيني و طير بيا و علّيني ..

تتفكّر ؟؟

أول مرّة تقابلنا ، أول كلمة حكيناها ، أول شيخة شخناها ، أول ضحكة و أول تبسيمة و أول دقة قلب ، أول رعشة يدين ، أوّل شطحة و أوّل غناية ، و أوّل تعنيقة و أوّل كلمة كتبتها فيك ..
تتفكّر ؟؟

نفكّر فيك و الظاهر إنو أنا نسيت .. نسيت اللي انت صعيب تتفكّر ، كي النفس اللي وقف و ما عاد يرجع ...