نعشقك و إنتي مش ليا ..

Maryem Souissi - مريم السويسي

خليتي بين نارين

بين عقلي و قلبي محتارة ..

بين الطفلة الي تحبك و تحب تكون معاك

و بين الي طموحها أعلى من أعلى قمة جبل تحب توصل و تعيش حياتها ..

علاش ما تقبلنيش كيف ما أنا ؟!

علاش كل مرة تحط شرط ؟!

ترمي فالشوك في طريقنا

و أنا كل يوم نزيد في غرامك نتورط !!

عرفتني متبرجة

الشعر حرير و الفم بالأحمر مزين ..

العين مكحلة و الخدين على لون الورد ..

نحب نقرا و نخدم و نحقق أحلامي و على روحي نتدلل ..

تحبني على خاطر حبنا نتنقب

و في الدار بين اربعة حيوط نتخلل ؟!

تحبني نكون لبسة مفصلة على قياسك و انتي فيها تتفنن ؟!

مانيش نكره النقاب ولا نكره المتنقبات لكن !!

أنا رسمت طريقي من قبلك و قلت فيه نكمل ..

طموحي مش اكبر من حبنا ..

لكن أنانيتك كانت اكبر و أكبر ..

حطيت شروط لحبنا و علاقتنا و قلت انا هكا ما نجم نكمل ..

قبلتك كيف ما انتي و ما حشتيش بأكثر من إنك تكون معايا ..

انتي قبلتني كيف ما انا لكن حبيت تبدلني ..

خاتم على قياسك ..

بقلم مريم السويسي