نشالله فرحة عازب
Par Marwa Jabou :
ملي أنا صغيرة و أنا عايشة في القوالب الجاهزة، في الأشكال، في المربعات و الدواير، و الأشكال المفتوحة ما فماش، كان المسكرة، المقاسة والمنظمة.. ملي حليت عينيا و هوما يملوا عليا في القواعد، أعمل، ما تعملش، قول، ما تقولش، البس، نحي، قوم، أقعد، يصير، ما يصيرش
..
و أمي قرصتني قداش من مرة، لحمي يزراق و الزروقية تتنحى أما أنا ما ننساش، و قداش من مرة همزتني قدام جارتنا، حتى كي نبدى قاعدة بعيدة عليها، تغمزلي.. الحقيقة مش كان أمي، أختي الكبيرة، واللي أصغر منها زادة، حتى خالاتي و مماتي
..
كبرت، و القرصة و الهمزة و الغمزة قعدوا يتبعوا فيا..كي الحبل الطويل الطويل إلي يلفلي بدني الكل، كي اليد البريئة الخفية إلي تسكرلي فمي، كي لجان الفرز في العهد البائد كي يصنصروا من المسرحية شطرها.. و نقعد نعس على فمي ونحبس في فكري، نتصور في أمي وما نعرفش على القرصة منين بش تجيني، لحمي خايف من الهمزة، و مانيش عارفة أناهي عين بش تغمزلي..نولي نسكت ونبلع فمي
..
أما لوقتاش؟ تي راني وليت مرا وباش ياخذولي راجل و يصدروني ليلة الدخلة، ليلة إلي يدخل عليا و ندخل في حيط.. زعمة أهوكا هناو عليا و ترتاح أمي من واجب القرصان، حتى عينيها يرتاحوا من الغمزان.. أما أنا زعمة نرتاح؟ نعيا و أنا نقبض، تي ماهو تمشي يد أمي، تجي يد حماتي، و كان ما غمزوليش خواتي، يهمزوني لوزاتي.. أما بالكشي عندي زهر وناخذ رويجل مقطوع من شجرة، لا بو لا أم لا أخت لا خو.. تي إي، و ها المقطوع يخليني نحكي على راحتي زعمة؟ من غير قرصة وغمزة و همزة؟ و حتى كان خلاني، لساني إلي مستانس بال"سيستام دألرم" زعمة يجي نهار ويتسرح؟ مش يقولوا "من شب على شيء شاب عليه" و أنا شبيت على الجارة إلي تستغرب كي نقص على كلامي و ناقف في وسط الحكاية ونقلب الهدرة، تربيت على الغمزة، على القحرة، على صوابع تتحلف فيا.. و يقولولي عندك خلل في الشخصية، تي ماهو الحق مش فيا، الحق في كوني بنية، و بنية عربية، كان جيت ذكر و عند أداة حفظ النسل، راني كي نتكلم يصفقوا عليا و يقولوا خميس على ولدي، هات بوسة يا ممو عينيا، و حتى كان كفرت ولا سبيت، يقولوا إي شبيه، راجل وسيد الرجال، كان جيت عادل ولا كمال، ونسيب في الهبال، راهم يقولوا ولدي كبر و عال العال
..
أما أنا خديجة، أنا مريم، أنا عيشة، أنا منيار، نسكت و نسكر و نبلع ونشد الدار، نستنى الأقدار، و نكون حاذقة و مقدية، وحتى دعيوة الخير مش ليا، خاطر الكبار كي يدعيو يقولوا نشالله فرحة عازب مش فرحة صبية
Website Design Brisbane