نحكيلكم على تونس
Zeineb Hajji - زينب حاجينحكيلكم على الناس التاعبة من شقاء الدنيا ..على إلي عايش كل نهار بنهارو ...
على إلي يفيق كل صباح و امنيتو يعدي نهارو بأقل الخساير...
مايتفكرش البارح باش ما يتحسرش ..
و مايتفكرش اليوم باش ما يتقهرش ...
نحكيلكم على باب الجامع إلي ما يتسكرش ...
على إلي يخلي بقعتو لمرا كبيرة في الكار ...
على المكتب والسحار ...
على نهج الدباغين والكتب القديمة المفرتة يمين ويسار ..
على البراكن الي مزينة بالنوار ..
على ريحة القهوة الفايحة ساعة صبحية ..
على نصيحة العزوزة و ڨد الصبية ...
نحكيلكم على زوز عشاق يخطفوا فرحتهم بعيد على عينين الناس ..
على حفر الكياس...
و على إلي يغني على "المڨياس" ..
على السفساري و"سيدي بوسعيد" العالي ...
على كل سطر كتبو "الشابي" ....
وعلى" الدڨله في عراجينها" و"سهرت منه الليالي" ..
على "إبن خلدون" ..
و على ريحة الياسمين وثورة الياسمين ....
على الهندي تفاح الفقير ..
على كل كادحة مازالت تجيب في الماء من البير ..
وعلى "زينة بنت الهنشير" ....
نحكيلكم على اذان الفجر ودعوة الميمة في كل ركعة ....
على وقفة الصاحب وقت الغصرة ..
على إلي ما ينساش العشرة ..
نحكي ونحكي ونحكي على تونس الخضراء ......
وما توفاش الهدرة.....
وما أحلاها ها الهدرة
زينب حاجي
Website Design Brisbane