نحب نقلّك الي ضحكتك مزيانة لدرجة كي نراها نحسّ الدنيا الكلّ تضحكلي موش كان فمّك و عينيك ؛ نحبّ نقلّك الّي بوسة الخال الي في جبينك زايدة عالسرّ و الكمّون الي فيك ؛ و الّي دنيتي منتصورهاش تقدّم بلا بيك ..نحب نقلك الّي أكااللّحية المهمّلة زايدة على ما بيّا ؛

انت و الشمس ؛ لمعة عينيك و القمرة ؛ ياسر على عينيّا ..  نحبّ نقلّك الي كلامك بتخلويضو بلحظات السّكات بالقفلات بالتمهميهات يحلّ قدّامي الفين باب و ثنيّة ؛ يفيّق كلّ حاجة نسيتها و ماتت فيّا ..نحبّ نقلّك الّي قدّامك بركا نحس بروحي طايرة في السّماء ؛ الّي محتاجتلك كلّ لحظة بالضّبط قدّ حاجتي للهواء .. نحبّ نقلّك الّي  ملّي عرفتك و لا عندي زوز غزرات ؛ وحدة كي نشوف الدّنيا بعبادها و بالحاجات المزيانة الي فيها ؛ ووحدة كي نشوف عينيك تتغزّل بيها .. نحبّ نقلّك الي انت مكش عبد نحبّو بركا ؛ انت عشقة ميقتلهاش الوقت ؛ انت حاجة منّي ؛ في دمّي ؛ في عروقي  تسري فيّا ..