نحبك و ما نعرفكش
Amen Rezgui - أمان الرزقيعندي مدّة نعشق فيك ,,
بالسّيف عليّا نلقى روحي نخمّم فيك ,,
انت ياللي ما نعرفكش ,,
و ساكن فيّا بالسّيف عليّا
راجل ,, و ما يحبّش يقسم
و كلمة لا ,, ما توقفوش
اللّيلة حلّيتلك الباب ..
ما نعرفكش
لا نعرف اسمك لا لقبك ,,
و لا وقتاه مولود
ما نعرفكش في صغرك
شعرك تطولو ولاّ قصير
و كي تكوّر تلبس شورت ولاّسروال دجين
عمري ما شدّيتك من يدّك و مشينا للمكتب فرحانين
و عمرك ما ستنيتني في الراحة نقسمو اللمجة و التفاحة على ثنين
عمرنا ما لعبنا غمّيضة وأحنا صغار
ولا جريت وراك ,,
و كي طحت انت سبقت دموماتي
و روّحت بيّا للدار
لا نعرفك منّك ضحكة و لا غمزة
عمرك ما عملت على خاطري عركة ,,
و روّحت للدّار الفم يضحك و العين زرقة
ما كتبتليش
جوابات نخبّيهم بين أوراق كتابي و أنا صبيّة ,,
و نطلّ عليهم ساعة ساعة بالسّرقة و نقراهم ,,
كاينّي أوّل مرّة نقرى
نفسّر لكلام على كيفي ,,
نخيّطك حلمة على قياسي ,,
و نستنّاها تكبر ,,
خاتم على قدّ صبعي
نتفكرك و نبكي خاطرك عايش فيّا ,, و ما نعرفكش
انت الرّاجل اللي عمرو ما كان ليّا
عمرك ما خذيتني في حضنك ,,
وكي قعدت وحدي شمّيت ريحتك فيّا ..
يدّي ما تعرفش طريقها في شعرك ,,
و الوشمة في بدنك وين مخبّيّة
عمرك ما شرّبتني قهوة مرّة ,,
و قعدت تتغزّل بيّا
و عمرها يدّي ما جات في يدّك في شطر الثنيّة
عمرك ما كنت ليّا ,, و عمرك ما باش تكون لغيري
بكيت ,,
خاطر الموت سبقتني ليك
بكيت ,,
عالوردة اللي ما شريتهاليش
و الكتاب اللي ما قريتوش
و الطّفل اللّي عمرو ما باش يقلّك بابا
بكيت عالطّفلة اللي تعرفك ,, و ما تعرفهاش
و عالبنيّة اللي مالصّغرة تحبّك و ما حبّيتهاش
بكيت على تصاورك الليّ شاعلة في الجواجي نار
و كلمة نحبّك كيف تدّعثر عالشفايف ,, و عمرها ما تتقال
بكيت على فرشك الفارغ ,, و مخدّة مازالت تستنّى ,,
النّفس متاعك وحدو يحسّسها اللي هي مرا
نحبّك ,,
خاطرك راجل و اسمك ماهر ,,
خاطر النّسيان موش ساهل و اللي كيفك ما يتنساش
يتخبّى في القلب و يبني بين الضلوع عشاش
و يتّكّى
,, و كيف يتقلّب ..
يوجع
اللّي كيفك تبكي عليه الرّجال قبل النّسا
خاطرك خويا ,, خاطرك بابا يا بابا و سامحها هالدّنيا اللي ما خلاّتكش تعنّق ولدك ,, و تسمعها هالكلمة
صغيرة ,, ما تعرفش
قاعدة في تركينة ,, و تصوّر
بدّلتلنا وجوهنا ,, و بدّعت بينا
و كي يعلى صوت البكية تحت الستيلو ,, تضحك و تزيد تنزل علينا
علاش يا دنيا ,, انت تغلط و أحنا اللي تتفسّخ أسامينا
كاينّي لا ضحكنا لا بكينا لا حبّينا و لا عنّا ناس تبكي علينا ,,
علاااااااااااااااااااااااااااااااااااااااااااااااش ؟؟
________________________
نحبّك و ما نعرفكش
أمان الرزقي
Website Design Brisbane