مَا يفُوتْكُمْ شَيْ

مع شكون حكِيت و مع شكون في شطر الثنية وڨِفْت و دَردشْت

مَا يفُوتْكُمْ شَيْ لبستي مستورة و إلا مكشوفة

مَا يفُوتْكُمْ شَي لشكون تبَسمْت و مع شكون ضحَكْت  و تبدا أك الْعيونْ تفركسْ بجنونْ

عُيونْكمْ لا تعْيا لا ترْتاح

مَا يفُوتْكُمْ شَيْ

غَنيتْ و صوتي مَسموعْ

و إلَّا تْخمرْتْ و ربطْت فِي حزامي من راَسي فولارة و ڨمت نتمايل عالنغمات و الڨلب ؟ كُلهْ غْصُصْ فَمْ تْڨَيِلْ فَمْ تباتْ

مَا يفُوتْكُمْ شَي

كلمت الغالي بالتلفون ! وذنيكم تترصد في كلماتي ! توحشْتك يا عمري

و عُمري تَاعبْ و مَخنوڨْ !

و مَا يفُوتْكُمْ شَي

تمَشيتْ عالبحر مع الموج حكيت و للشط بكيت و مَا يفُوتْكُمْ شَي

لِميمَه اللي تواسي دافنتها تحت اللحود و البو تاعب و مهدود و مَا يفُوتْكُمْ شَي

مَا يفُوتْكُمْ شَي تحْت  المراقبة عايشهْ

و ما تخفاكم خافيهْ

من وراء البيباان تطلوا عليا من شقوق الشبابك الْمهّريهْ

لحمي نهشتوه و عرضي جبدتوه و مَا يفُوتْكُمْ شَي

عينيكم خَنڨتني

كَبلتْني

كَتفتلِي سويڨاَتي

و مَا يفُوتْكُمْ شَي

وو ڨْت اللي طحت و تْكبيتْ على وجهي و ما لڨيت يد تشدني لفوڨ فاتكم العرض و فَاتْكم كلّ شيْ

فاتكم الحڨ و ريتوا كان الماسك اللي متخبية وراه

فاتكم حڨيڨة الضحكة اللي مش مالڨلب و الدمعة اللي مش مالفرحة عالخد و التلفون اللي ما جانيش و الوردة اللي ذبلت بين ايديا و الكتاب اللي ما وصلنيش و الجواب اللي بدل الثنية لغيري

فيبالكم  مَا يفُوتْكُمْ شَي ؟

فاتكم  حڨيڨة الكاس اللي طاح من يدي تهرْس

و النفس المتڨطع و المرض اللي في بدني  ينهشْ

مَا يفُوتْكُمْ شَي و فاتْكم كلْ شيْ