أنا نحبك أما لي بيناتنا أقوى من أني نخسرك على حكاية كيما هكا " كلام كيف قلتهولي حسيت الدنيا دارت بيا و دموعي هبطت من عينيا حاولت برشا مرات نكتبلك حاجة كان جا بيدي راني كتبت عليك ألف حكاية و رواية أما لقيت إلي كل كلمة بش نكتبها ماهيش بش تعجبك وكل حرف يخرج من قلبي بش يقلقك

حاولت نكذب على روحي ونكتب حاجة لصديقي الباهي وعشيري الغالي إلي نعزو بارشا ونحبو كيف خويا ياخي قلبي مطاوعنيش وقالي متكذبش على روحك ياخي قررت باش نكذب عليك إنت شوية ونقلك ل أنا منحبكش.

اي نعم أنا راهو منحبكش، صحيح قلبي يدق بلقوي كيف نشوفك ولا نسمع صوتك ولي ندخل بعضي و نبدى نرعش كيف تبدى بجنبي صحيح نقوم انقز كلمهبولة تقول طفلة صغيرة مدولها كعبة شكلاطة كيف تتفكرني أما صدقني منحبكش لحكاية ومافيها إلي نعدي ليالي ساهرة وحدي نخمم كان فيك أما منحبكش دموعي تهبط وحدها ونموت فنهار ألف مرة كيف نتفكر أنا

شنوا بنسبة ليك ولي فما حاجة ناقصة بينتنا عمرها ماهي بش تكمل كي حرف ناقص في لعبة سكرابل كي جندي ضايع في لعبة شطرنج ميبدلش برشا حاجات أما ماتبدى اللعبة كان بيه

أما راني منحبكش لحكاية الكل معاك نحس روحي حية قوية فرحانة أما نعرف إلي مش كل حاجة نتمانوها في دنيا هاذي ناخذوها وكيما قالو ناس بكري "كل شي بسيف إلا الحب بالكيف"

هاذاك علاه لازمك تعرف ل أنا منحبكش أنا نرتاحلك نفرح كيف نحكي معاك نتوحشك نغير عليك أما صدقني منحبكش أنا نفرح ونبكي في نفس الوقت كيف نعرف لي قلبك مع حد أخر نفرح على خاطر فرحتك هي فرحتي ونبكي على خاطر فرحتك مع غيري. تأكدت تو ل أنا منحبكش ؟

كيما قتلك أنا منحبكش أنا نعشقك نتنفسك ونكره روحي على خاطر نحبك. نكره روحي على خاطر نولي ضعيفة قدامك و أنا مرا قوية عمرها لا ضعفت ولا قلبها دق لحد كيفك إنت, مرا عدات حياتها كاملة خايفة لتحب تبعد عليه وتهرب منو من زنقة لزنقة كل مايعرضها تتخبا، تبدل ثنية أخرى وتهرب تجري باش متتوجعش، مرا تكتب عالحب تقرا عليه أما شعارها "ابعد عالحب و غنيلو ".

تعدات أيام وليالي كل يوم نقول غدوة ننساك، غدوة نكرهك غدوة معادش نهواك !! حتى لين نراك في حكاية ونتذكرك في غناية كيفاش انجم نعيش من غير ضحكتك في سمايا؟ من غير منراك كل يوم ونحكيو حتى تتخبى النجوم؟

قتلي تو يجي نهار و تنساني وشوف حاجة تتلهى بيها!!!  صدقتك، أما راهو مايحس بالجمرة كان لي يعفس عليها و من وقتها وانا نستنى في ها النهار  المبروك السعيد النهار إلي نعاود فيه حياتي من جديد النهار إلي نفيق فيه فصباح ومتكونش إنت أول حاجة تجي على بالي، النهار ألي نقرر فيه باش ننساك ومانبداش خطوة لقدام وعشرة لتالي، النهار لي تطفى فيه النار لي تشعل فيا كيف نعرف لي إنت عمرك ماك باش تكون ليا.     

 
وكيما كل عشية يطير النوم عليا وما زاد على مابيا كان لي أنت بديت تبعد عليا، ومايبقى ليا كان إنو لازم ننساك وكالعادة توفى السهرية بغناية لطفي بوشناق

تشْهَد عليّ المْطَرْ والعْصَافِرْ في بَابْ بْحَرْ

آنَا لِيكْ ونْمُوتْ عْلِيكْ لَكِنْ ما عِنْدِيشْ زْهَرْ ...