منحبش نِبكيك

اما انتي نار ولازم نطفيك

منحبش نواسيك

ولا نقلك اللطف عليك

فيا ولا فيك

حكاية ١٠٠ نهار و درا قداه من شهر

و تحبني نلخصك في سطر  ؟

نوارة و ماتت بالشر

دفلة تستنى في مطر

طفلة ضلام و العينين تجهر

و منحبش نِبكيك

ولا نتذكرك و لا نطير السوّ عليك

تستاهل لي صاير فيك

نشمت  و نقلك شوية فيك

و طرف حروف خسارة فيك

منحبش نِبكيك

ولا نخلق منك جرح و وجيعة

و لا نحب نسميك فجيعة

و لا يعزيوني فيك

يمكن مازال القلم شاره و يحب يحكي عليك

و عالجرة و التتبيعة

و خطاويك و التضييعة

الدمعة المكفنة

و بوسة مرصوصة

و جواجيا لي عليك مرفوسة

و قلبي  الممغوص

منحبش نِبكيك و شخص كان تهون عليا و جهار  نبكيك

قتلك مانقبلش العزا فيك

و مخيبك كي عيوبي

و نكرهك قد ذنوبي و عندي في الدنيا نهارين

بنيتلك قصر

و هَدِيتلك  جبل

و حفرتلك قبر

و هديتك خمسة حجرات قد المشيات و الجيات

و رميت وراك سبعة

و ماصبيتش وراك الماء  

بكِيتك لين صبت الشتاء

و نهارت لي نراك و عليك لا نقز ولا نترمى

و بالكعبة نحلف ضربني العماء

نخاف فيك نترزى

كيفاه نعملك عزا ؟ و انتي دايا و ساكن بين الحرف و الطرف و فالشقيقة و الرقيقة و بين الثانية و الدقيقة و انتي تكبش كي الشهيقة و قد وحشي لتعنيقة

بكيتك