من غيرها تنجمش تعيش
Shayma Grine - شيماء ڨرينهي..
ضحاكة مصرارة
حنينة و يتيمة
هي ..تغزرلها مرة وثنين و عشرة
وتزيد تشدك ..
يشدك نفسها وبدنها و الغنجة فمشيتها
هي .. هي إلي تولي شاعر على خاطرها
تكتب و تنحت وتعاود تغطس
هي بلادك و دارك و ريحة حومتك
الصدر الحنين ودفا الوالدين
،تبكي... تبكي و تزيد تبكي كيف تتفكرها
تتفكر رجوليتها و كسوحيتها
ما يهدها جبل
..وما يزعزها هم
..مشكلتها تحب تقاوم ..تحب تعيش.. تحب تفرض روحها في مجتمع نساها في روحها ..
مشكلتها أكبر من صبات جديد وإلا قلم حومير
مشكلتها مش عرس و كمشة صغار حسهم كالبندير
افهمها افهمها يعيشك
وسيبها
سيبها تشطح وتغني و ترقص
وتسبك كان عايرتها
سيبها تجبدلك عينيك كي تقولها يا قطوس
سيبها تحدفك بالحجر وتعيط وتصيح
تكتب فالحيوط وتعلي الصوت
بش تتحرر
من قضبانك من حبوساتك من حدودك وهمومك...
وتولي تبكي
تبكي وتمخط
خاطرها قاهرتك
و من غيرها تنجمش تعيش
شيماء ڨرين
Website Design Brisbane