مكتوب

mariée seule
Saïda Aïcha Darragi - السيدة عايشة الدراجي

...فديت

كل مرة يسألوه

نفس السؤال هو بيدو يعاودوه

منغير ميبدلوه... " فما حاجة"؟


وكي تجاوبهم وتقول لا مفماش

يقوللك تي علاش تخبي فيه ؟؟ أية وقتاش؟؟

يا ولادي أنا هلحكاية في حساباتي ما حطيتهاش

حياتي ما زلت ما بنيتهاش

خليوني نكون روحي ! راهي الدنيا ما تستناش !! ...ومازال الوقت ماجاش

شنوا هل الكلام إلي تقول فيه ؟؟

راك عمرك قاعدة تضيع فيه

والتكوين للراجل خليه !! انتي مرا و هالموضوع لازمك تخمم فيه

تي لكلو مكتوب

ومكتوبي هاني نستنى فيه

ويجي نهار و نلاقيه

...واللي فيه الخير ربي يسهل فيه

مكتوبك يا بنيتي انتي إلي تبعد فيه

وطريقك وحدك حابة تمشيه

وكل فرصة تجيك تضيعها من بين يديك

بعدا كل واحد لازم سبة اطلعها فيه

موش عارفة هذا دلال وتسيب فيه

ولا مرض وتبليت به
!
أنا لابس علي ، طفلة عادية

نحب نكمل نص ديني ونعيش متهنية

أما وينو إلي يحس بي ؟؟

أنا ما حشتيش بفرصة بين يديا

حشتي بواحد يخاف علي وفي قلبوا يسكر علي

واحد نحبو أكثر من روحي وعينيا
! أما وينو إلي يفهمني ويحس بي ؟؟
....
يا بنيتي خوذ نصيحتي

ياخي الحب شعملو به؟؟

وكي مايجيش؟؟ تقعد عمرك كامل تستنى فيه؟؟
...
ومبعد هلوقت هذا تندم عليه

وقتلي ترينوك يهرب و بابورك يزفر عليك

إسمع كلامي وفرح والديك

وخليهم يشوفوا صغيراتك بين يديك
...
يعيش بنتي أنا راني ننصح فيك

وكلامي حطوا حلقة في وذنيك

أنا نفهم فيك

وإنت عملت إلي عليك

أما أنا ما ناخو كان إلي قلبي يدق ليه

إلي كي نسمع صوتو ننسى العالم وما فيه

واللي نرعش كي نلاقيه

و نولي نشوف الدنيا في عينيه

هو إلي حياتي بش تزيد تزهى به

واللي معاه...طريقي بش نكمل نمشيه

و مايهمنيش ...ما فيحالوش واللا لابس عليه

المهم يبادلني حبي ليه

ويوعدني إلي عمرو ما يخليني بلاش به

واللي حياتنا بش نكملوها ويديا في يديه

وهذا لكولو مكتوب

ومكتوبي هاني نستنى فيه

ويجي نهار و نلاقيه
...
واللي فيه الخير ربي يسهل فيه


السيدة عايشة الدراجي


مكتوب