معاك و فيك و بيك
Lina Miloudi - لينا ميلوديأعمى ضرير موش شايفك
أعفس عليّا بحفايفك
إلمسني و تلمّسني و خلّي ڨلبك يرصّني و يقرطسني
خلّيه يخبّيني كي نخاف و يورّيني كي نغيب و ما نتشاف
كتفّني بعروڨك و صب دمّك في عروڨي
و خلّيني نغطس و نغرّق فيك حروڨي
حبني و فيّا حبّبني
أرسمني و أقراني و إكتبني
و ما تنساش تدرّڨني و تكفّني في ڨلبك
و بعد ما نضيع بين نبضاتك ڨلّي نحبّك
أطرزني على بدنك و وشّمني على جلدك حروف ضايعة
لوّح كل كلمة في شيرة و خلّيني ما ندلّش ، خليني فيّا حايرة
و في طريق تخبيشي لي على ضهرك سايرة
لوّني !
موش بالألوان !
لوّني بلون عينيك و خبّي فُسطي الأحزان
نفّسني و تنفّسني و عبّي هواك في رواريّا و خلّيني بهواك نتخنڨ
شعّل النار في ڨلبك و خلّيني ثَم نتحرڨ
أخرج من بدنك و إيجا !
موش إنت روحك ، موش روحك إنت
ترهْويجة !
ايجا نعيشو في بدن واحد بزوز أرواح
عفّسني و إرفسني و ضيّڨ عليّا و السّماح !
ايجا و خلّيني كي نفد و نتخنڨ نشم ريحتك نرتاح
ايجا في الليل ، صباحي خسارة و ليلي رباح
ڨدّام داري أنصب خيامك
حطني بين حروف كلامك
و تذكّرني حتّى في غمضة !
عنّقني و إكبس
حط ساقك فوق ساقي و أعفس
و إفهمني بغمزة عين ، بوَمضة
و ما تنساش فيّا تفهّمني
دلني و حلّلني
حرّرني و كبّلني
ذبّل عينيك و معاهم ذبّلني
عيّشنا باللّيل كي الخفافش و في الدّحيس شبّك صوابعنا و ما تخافش
شدني مليح و ما تفلّتنيش
تعرفني من غير شدّتك نضيع و في شوارعك نطِيش
أحبسني !
أحيا بيّا و ليّا و فيّا
و هز العمُر لي بقالي و خلّيني فيك حيّة
خلّيني نكدّس كلامك و نرشڨو على أحلامك و نڨلع النجوم من السماء و نغرسهم في بدني و نضوّيلك ضلامك ! حتّى شويّا !
بعد هالعِشرة ما عاد ينفع ملامك !
و الرّب لي خَلقك تِخلقت ليك !
و نهايتي معاك و فيك و بيك
غشّشني !
و خلّيني نرضّيك
تكّي راسك على كِتفي و خلّيني نهز الحمِل و التعب عليك
فرّغ وجايعك في كلامي
و رد لتفرفيطة ڨلبك سلامي
ولا نسيت ! ماو ڨلبك في صدري مدفون !
في عز اللّيل يقوّمني صوتو في منامي نڨلّو لوين و بنرة صوتك يڨلّي :
" to the moon "
لينا ميلودي
Website Design Brisbane