تفدّ و تجنّ كي تحس بمخّك فارغ يبقبق يطربق يطقطق ،متكيّف و مفلّت و متڨلّق ،تجي تفضها معاه تشبك و توحل معاه تلڨاه معبّي ظالك النوم فيه يكبّي و هو يتعنطز و يتكربص ،شبي عزاه ، التّخمام بلاه، ڨلبك فاهم  الطّرح و سلّ روحو و خلاّه،

علاه تو هكّا مخّك غلّب عليك ،مڨعمز عليك هه،كيفاش تو مشا في بالك واحل معاك و شاريك ،ظهر سارق الحرفه و راكش مع الغربه و مخلّيك؟؟؟!!

الناس الغربه هبلوه شويا خرج من سينتو و هبّطو عليه الحمل فشلوه ،

هو يجي يفيق على وضعو و هوما يدوخوه ،كل ما يحب يسلك و  يبعد و يخلي كان البلاصه و حتّى الجرّه يفسّخها أما زايد و الله لا يسيبوه، إنت عارفهم تلكدوه و ماهمش ناوين يرحموه ،قاوم مالا كسّر الحاجز و تعلّم تتكلّم و في حقّك ما تسلّم،تعلّم تكمبس و تجمبز ،خلّي الخوف على جنب و ما يلزّك حد،

ما يلزّك حد تخمّم وقت تحب تعمّر ،تعمّر بالك بقهيوه و سيڨارو

و تتفرّج عليهم كيفاش مع الأرياح يميلو ...