مستكوزي
Maryem Ayari - مريم العياريقهوة بجمبك و كيت في وذنك
مستكوزي عامل بون كيف فجاة يهب
عليك الالهام و شهوة الكتيبة
ايا تقوم تشمر على ذراعك و تخرج اكا الكراسة المهرية و تشد ستيلوك و تقول ايا بسم الله
تلقى مخك واقف ، حابس ،فارغ..
وين مشى الالهام
منين بش نبدا و اش بش نقول
زعمة طحت على راسي ؟ زعمة بش نعاود نتليع
اخي منشعفش ؟ مش قلنا بش نسكروه هالقلب المحنون ؟
مش قلت بعد بوك حد ما عليه يهون !
نهار كل وانتي تتحلف و تتكتف و في لخر قلبك تحكم
اشفييه يتحب و هو بارد سارد لا يعرف كلمة حلوة و نحبك حب يقول
اشفيه يتحب على طرف اللحية تي شطر الشعب مهيجها و بالبزاق مركحها
اشفيه يتحب !
اما انا نحبو ببهاوتو. بحلاوتو،بمرارتو نحبوا .
بزينو بعينو ، بلحيتو بشعرو ، بيديه بساقيه ، بخدودو و عروق يديه بكل حاجة فيه نحبو و نموت عليه
ماهوش رخص ولا حلان عينين اما انا هكا مكتوبلي عالجبين
لا نفرح و لا قلبو يلين
حبو في سري نخبيه و غرامي نسميه
طول عمري نحلم براجل يكتب عليا و نكتب عليه
يتغزل بيا و نضيع في عينيه
طحت براجل يحب يسمع و ميحكيش
ياخذ و ميعطيش
ماكل قلبي حشيش و ريش
منعرش علاه نغير عليه و كان نلقى عالعينين نخبيه
زعمة كان انا مغرقني فيه !
زعمة فما شكون يحبو كيفي و يخاف عليه !
نحب نسالو وين مشيت و وين جيت و مع شكون تحكي غيري
اما ميجيش لاني حبو و لا صاحبتو و لا عندي الحق عليه
تي محسوب جات كان عليه
كيما قالت اصالة "هي جات على جرح يعني مالجراح في الكوم بقلبي "
عادي يعني
اما زادة كيما قالت فيروز في امل ايه في امل
عندي امل فيك عندي ثيقة فيك
يفجعني بكلمة نحبك الي ولات كي شربة الما عند الغير
يمكن يجي نهار و يولي عليا يغير يقلي انتي الروح و العينين
بعدك القلب يحير و بقربك بالف خير
يمكن يجي نهار يخبيني عندو و بين يديه
و في حضني ندفيه
يتلهى بيا و يعوضلي خوف بابا عليا
يمكن يجي نهار و يولي عندي حق فيه و عليه
يحكي كان معايا
و نخلي وقتي كان ليه
..
بقلمي اما مش عليا ;(
بقلم مريم العياري
Website Design Brisbane