زيد اقعد شويا...

قتلك منجمش مرتي تستنى فيا...

هي مرتك و أنا شنيا...كرسي متع طاولة ...في قهوة باردة ....تراكنها...معبية كوبلوات...أنا غادي بلاصتي...أنا شنيا...هي مرتك و أنا شنيا....أنا شمعة تطفاها وقت ما تحب و تشعلها وقت ما تحب...أنا ورقة تكتب علاها و تقطعها كي تكره كتيبتك...

أنا جنينة ما تسقاها كان تعطش...أنا وراق خريف...أنا شمينية ليك كي تبرد تجاها بش تدفيك...أنا شي و هي كل شي...أنا نرقد في فرشي وحدي...و هي تبات معنقتك...أنا نحل عينيا على سقف ظلام و هي تحل عيناها فيك...أنا معبية مخدتي بريحتك...و هي تتنفس فاها...أنا الحب و هي العشرة...أنا نطيح و هي تقوم...

أنا مازلت نتعلم في الخطوة و هي متعنكشة فيك...أنا نحسب في الايام...و هي قاعدت تهرب بيك...أنا ناري طافية...و هي نارها شاعلة...أنا عروقي شاحت منك و...هي هي معبية بيك....أنا تصويرت ظلمة ...مغبرة....مردومة في قجر قديم.... هي هي كل يوم تصويرة تتلون من جديد....أنا نتخيلك...نرسمك...و هي هي بجنبها قاعد....أنا مجروحة و أنت تداوي فاها....أنا فيك....و بيك...و ليك و هي هي ترجعلها كل يؤم...هي تعدي معاها سوايع ليالي...هي شمسها كل يوم تطلع و انا هلالي يجي مرة في عيد ....هي و انت....و أنا وين ...