على خاطرك محيرني... معاك معادش فاهمة روحي... واللي حاستو في قلبي ليك هو اللي مصبرني...

على خاطر مش فاهمة اني شنوة بالنسبة ليك... صاحبة كيف الصحاب الكل... والا الكلمة اللي شفتها في عينيك... بكلمة وحدة تطلعني لسابع سماء... وبعدها بدقيقة, نلقا روحي غارقة في الدموع والبكاء...ليلة نسهروا للصباح نحكيوا في كل شيء...

تحكيلي على روحك, وصحابك اللي تحبهم... خدمتك اللي فرحان بها... امك اللي حاطها في عينيك وتحب تهنيها... الفازة اللي صارتلك كالعام في البحر... وكيفاه تعدي ليالي , ساعات تتفرج في القمر...

والليلة اللي بعدها ,بكلمة وحدة تجاوبني... بكلمة وحدة تقتلني الف قتلة وتعذبني... تشككني في روحي... قول نحكي مع زوز عباد... ندور على روحي ونقول مرخصني... في يديه كاللعبة... وقت ماحاجتو بيا يناديني نحكيوا للصباح...

ومن غدوة كيف يجاوبني بكلمة ونص, على بهامتي يخلصني... ساعات نقول يمكن ميحبش يهنتلني... كيف نسألوا حاجة يجاوبني وعلى اللي حاجتي بيه يفهمني... نفول طفل باهي... هاكة علاه هو باهي معايا, كيف ماهو باهي مع الناس لكل...

ندور على روحي ونتغشش... نستاهل اني نجبد فيه... هو خاطيه... وبعد نتذكر, اللي اني عمري ماكلمتو اللولة... كل مانروح, نلقاه هو باعثلي حاجة دلولة... نلقاه هو جابدني بالحديث... واني معاه وليت كالورقة هايمة مع الريح... لاني قادرة نصبر... لاني قادرة نتكلم... نخاف لانفسد اللي مابيناتنا...

نقول صحاب نحنا عادي... واني قاعدة على روحي نفلّم... نحنا صحاب... نتفكر لكلام اللي قلتهولي هاكاليلة... قتلي" خايف اللي انت تحب وتربط روحك في حكاية كبيرة"... بالنسبة ليك مازال بكري... مازالوا برشا حاجات تحب تعملهم قبل مايبدا العمر بيك يجري...ليلتها حسيت كيف مايقولو لكلام ليك والمعنى على جارك... حسيت روحي فقيرة نطلب في الحب, واقفة قدام باب دارك... والحب عمرو ماكان ُطلْبَة...تعرف كيفاه... حتت صحاب مش لازم نكونوا... وقيت واحد يفيق من هالغلبة...