...مانيش بلعاني
Monia Messoussi - منية مسوسيريتك تبسمت، قربتلك رعشت؛ مسيتك ترهوجت... نتفكر إلي الدنيا كانت باردة ؛ ضحكتك دغدغتني وعينيك دفاوني... كيف
...شديتلي يدي نسيت كيفاش نمشي ... حبيت نقلك ما تسيبنيش لا نعثر و نطيح
...مانيش بلعاني
نسيت أنا شكون وشنعمل بحذاك ... نسيت الوقت نسيت العباد نسيت الليل والنهار ... نشوف في تلاثة حاجات الماء
والسماء مربوطين بخط في اخرهم ... وعينيك رابطنني من راسي لساقيا...منحبش الربطة أما عينيك حاجة
أخرى دنيا أخرى...دنيتي إلي كانت ضايعة مني وإنت جبتهالي بين رموشك
...مانيش بلعاني
حبيت الدنيا وحبيت الوقت ... حبيت أصحابي وحبيت روحي ... حبيت الموزيكا والكتب ... حبيت القراية والكتيبة ... حبيت
الكبير والصغير وإلي يدبي عالحصير ... رجعت طفلة بنت خمسة سنين تجري على حرف البحر وتلعب
على الرمل ... تتفرج في توم وجيري ... تصور في تصاور فيهم برشة ألوان :
شمس وسماء وبحر، فلوكة فيها بحار يرمي في
... الشبك ويقول يا رزاق
صبية بروبة تتكركر وفولارا صغيرة على شعرها تلم في المادالينة من شجرة
في جنينة ضريفة في شوكتها فما دار صغيرة و مزيانة ؛ بيضاء وشبابكها زرق فيها زوز بيوت وكوجينة وفي تركينة مالتراكن فما
...شيمينيا قديمة نارها تبعث في الدفا
...مانيش بلعاني
في لحظة كبرت و وليت مرا قلبي يدق وبدني يحس ... تبعتك حلمت بيك و عشت معاك بين هواء وفضاء ... رديتك قطعة من
بدني و من روحي ... تمنيت نخطفك نبيتك بحذايا ليلة ... نلبسك وما ننزعكش ... نولي نهتري بيك ... بضحكتك وبعينيك بصوتك
...بتبسيمتك و بلمسة يديك
...مانيش بلعاني
نسمعك بين نوتات الغنايات ونشوفك في الكتب بين الكلمات؛ نكتب ليك وبيك؛ نمشي ونجي فماش ما نسرق دقيقة معاك
...نعبد فيها قلبك و عينيك
...مانيش بالعاني
سامحني كذبت عليك ، وليت أم وما قتلكش؛
عملتك ولدي من غير ما نشاورك؛
نخاف عليك مالهواء إلي يبردلك يديك؛
مالشمس ونتمنى سحابة تظلل عليك وين تمشي تتحرك معاك
، نخاف تبرد ، تعطس تكح يوجعك راسك
نحبك أحسن واحد في ثنيتك في خدمتك في أصحابك والناس إلي دايرين بيك
دمعتي ولات قريبة كل ما نشوفك متقلق تهبط
... وحدها
...مانيش بلعاني
عملتك خو ... خو حرمتني منو الدنيا وما خلتنيش نفارعو و نتدكك عليه ... عملتك صاحب نحكيلو إلي في قلبي الكل، إلي
... يتحكى وإلي ما يتحكاش بالكل ... لوحت قواندواتي من نهار إلي عرفتك
...مانيش بلعاني
طموحي كبر معادش عندو سقف... نخدم ونقدم ليك وبيك خاطرني نحب نشوفك فرحان، مش فرحة بابا وأمي أما فرحة راجل
... يقولي بعينيه راني فرحان بيك
...مانيش بلعاني
نكره الغموض و التشويق... نخاف منهم، نحب الضو نكره الظلام ، نكره أنصاف الثنايا ... كي نحس نحس بكلي، كي نكره نكره
بكلي وكي نحب نحب بكلي
... أنصاف الحلول ما تعنينيش
مانتصنع في شي وماني مركبة في شي ... نحبك بكلي، بقلبي
بمخي بوسط ممو عينيا، بدنيتي إلي نحبها ليك وليا ...
... نحبك ونحب نستحفظ عليك: قدرك ،قيمتك ،صحتك ومالك والي تتمنى في الدنيا هاذي يكون ليك
...وكان نلقى عينيا في طبق نهديك ... وراسك لاهم خسارة فيك
... على خاطر في حياتي ما سمعتش وذني و ما راتش عيني أرجل منك، أحن من قلبك ولا أدفى من يديك
...مانيش بلعاني
...لقيت روحي معاك و ما نجم نكون كان أنا بين يديك
...مانيش بلعاني
كان يسألوني شنوا تتمنى ، نقوللهم
...مانتمنى كان نشوف الفرحة في عينيك
بقلم منية مسوسي
Website Design Brisbane