كان جا الخو يحن علي خوه ما يبكي حد على بوه...

كان جاء الخو ينفع خوه, مايبكي حد علي مشاو وخلاووه...

مافما حد في الدنيا هذي يحبك قد روحك, ولا يخاف عليك على قد ماتخاف على روحك...

ولا فما حد يتمنالك لخير, كان ماجا باش يربح من وراك حاجة...

ومافماش عصفور يصطاد لربي... ومافماش حتى واحد لين يموت سرك يخبي... واللي يحبك اليوم غدوة ينساك... وعالغلطة يستناك...يجي نهار ويعايرك اللي هو عطاك... يجي نهار ويعايرك اللي هو في وقت البرد غطّاك... يجي نهار وتفيق اللي هو خلاك... على طول يدّو رماك.. نساك...

والجديد يارابح... وبلاصتك في وسطهم ليوم غدوة ماتلقهاش... علاش... كيفاش... ساهلة ياسر! إلّي جابتّو ساقيه العصا ليه...إلّي يدير روحه كدوة يتحمل رقيص الجديان... حب روحك ومايهمك في حد! حب روحك! حبها! بخلاف روحك ماتلقى حد! البو والام يموتوا... ووقت الجد ماتلقى لا خو, لا ولد..

تلقا كان روحك... هاكة

علاه تعلموا حبوا رواحكم! اعشقوا رواحكم! وماتهبطوا ريوسكم لحد... وماتوصلش روحك, للغير اليد تتمد... يدك مدها كيف تشري كتاب جديد, بيه عقلك تعيّن... يدك مدها باش تشري

حمير, شفايفك المزيانين بيه تزيد تزين... يدك مدها باش تخطف فرصة, جيبك نهار أخر بيها تليّن... حب روحك وعلاها... في الهم نساها... طفي اللي بكاها... وفي السما السابعة خلاها... بلاصتك عالية, ماتهبط راسك لحد...

اقرا واخدم واحلم وطير... كيف تحط حاجة في قلبك, وتخدم علاها, تتعب وتشقا وتعيش ليها ... تصير... تجي نهار وتصير... وتكبر انت وتعلي جوانحك... وتطير...