متنسانيش ، حتى كان رجعتلها والا حبيت بعدي حب جديد تفكرني وقولهم كانت بيناتنا أيام تفكرني وقولهم كانت بيناتنا أحلام تفكرني تو تعرف علاش كنت أنا معاك تو تفهم علاش صبرت أنا معاك, تو تندم خاطرك حسبتها شكون ليربح وبدلت ثنيتك،،تفكرني ..حبيت نحكي معاك ،حبيت نوصلك كلام ،تمنيت نحكيلك كيف ماكنت نعمل قبل.

انتي تنجم تسمعني وساهل ياسر اني نحكي معاك ،كيفما الناس الكل تعرف احنا في عصر السرعة والمساجات إلي بلاش فلوس ،أما لكلام معادش ينفع ، احنا ماجاتش بيناتنا كلمة أعوذ بالله، وهذا يسمح بش نبعثلك مسج،لكن اهمالك ولامبالاتك تخليني نقدم خطوة ونوخر عشرة لتالي،

نحكي عليك بحزن أم فقدت رضيعها،بفرحة بيبي عطاوه الحلوى،بحسرة شيخ على شبابو،بقهرة بنية والديها تخلاو عليها،نحكي بإعجاب وبلهفة كبيرة ،نحكي بهم وحزن وحيرة،نحكي عليك ونزيد نغرق فيك،،، لا لا بالحق قلبي تعبا عليك ،معادش نعرف نحبك ترضيني وإلا آنا إلي نحب نرضيك،مانيش عارفة نحبك تبعد علييا وإلا أنا إلي نبعد عليك،نعرف إلي ماكش بش تقرا الكلام إلي كتبتو عليك ,سامحني،كان جيت نعرف نغني نغنيها ليك ،، أما ربي عطاني موهبة الكتابة وهذي رسالة ليك ،،

وكان تلم إلي كتبتو عليك ،تألف بيهم كتب مش كتاب.الحاصل ،كلمات مش باش يوصلوك ،باش يتعداو قدام عينيك أما ماكش باش تقراهم ،انتي أصلاً ماتستهويكش الكتابة و الكلمات،صدقني حبيتك تقرا برشا حاجات.في وقت من الأوقات توحشتك،حبيت نجيك نملا منك عينيا ونشبع بيك،حبيت نراك ونسرح في عينيك ،توحشتك ،،توحشت غزرتك،صوتك ،ضحكتك شدت اديك ،على فكرة ديما نسأل عليك،نتبع أخبارك نريح قلبي ونطمن عليك.حبيت في مرضك نداويك،،في محنتك ناقف معاك ونشدلك ايديك ،ماحبيتكش تحس روحك وحدك محبيتش نبعد عليك .

حبيت نبعدك عالشر والحقد نبعدو عليك،حبيت نهديك ،نتحمل معاك الوجيعة والضعف والضيق،حبيت نهزك لبعيد إنسيك فالواقع ،الأفكار إلي ساكنتلك مخك والناس إلي دايرين بيك .تمنيت نرجعلك ، والقلب يسامح فعلك،ونعيدو ليام،، حبيت نرجعلك وترجع متاعي ،أما انتي نسيت وبدلت ثنيتك ،وانا عمري مانسيت. ،أانا نتفكر وراضية ونعرف إلي ربي جعلها أسباب ،وكيفما جا نهار كنت سبب فرحتي ،ليوم وليت سبب أوجاعي وسبب في الفراق بيناتنا .ومكذبش إلي قلي نهار: كل شي منو برشا يذبل ويموت،وأنا حبيتك برشا وحلمت بيك برشا.أما إلي يحسب وحدو يفضلوا ، وانا هاو فضلولي برشا حاجات:كيما تصويرتك ، غزرتك،ضحكتك تبسيمتك،كلامك،بلادتك، مشاكلك وفازاتك وجبل تفاصيل لاحبوا يوفاو لاحبوا يتنساو .وانا مانسيتش ومانجمتش ننسى ،،من بعدك لاعشت كيف ماحبيت لاعرفت كيفاش نعيش ،،

تفكرني وماتنسانيش ، تفكرني وأحكيلها عليا ،قول كانت بيناتنا أيام ،قول كانت بيناتنا أحلام .حبيت الدنيا وحبيتك عشقت الصدفة إلي لمتني بيك،شكون غيرك فرحني ؟ شكون غيرك ضحكني ؟ شكون غيرك خلاني نحلم وعلمني نمشي في ثنية صحيحة؟ عذبني غيابك وجرحني وغيرك انتي ماحاجتيش تفكرني وماتنسانيش.أما ليوم ماقداميش حل غير إنو نكتب عليك ، نكتب في أوراق ، نألف كتب عليك ونحرقهم ومانجيش نحكيلك باش ماتوجعنيش.يتعداو أيامات وشهور وحتى سنين وأنا لتوى لانسيت،،والناس الكل ستانست ونسات ، وانا عندي مدة متفكرة ،ومانسيتكش . قالولي أنساه ، قالولي الحب تعطي وماتاخوش قالولي أنساه وتحمل باش ينجم هو يعيش .انتي خترت البعد وعارفة انك كي تمشي لثنيتها ماتوليش،، أما مش مهم،المهم في يوم تفكرني وماتنسانيش.