ما نفهمش في السياسة. .. لكن نفهم الي حال البلاد ما يعجبش... الي اولاد بلادي ثقلت عليهم المسؤولية... غلات عليهم العيشة... رزن عليهم الحمل... الي كان فيهم ميت بالشر زاد مات... و الي أمورو كانت ماشية وقفت بفران شايح قدام زيادات مجلس الهانا...

ما نفهمش في السياسة. .. لكن نفهم الي بعد خبز و ماء بن علي لا ... مشى في بالنا باش ناكلو دجاجة في راس العام و نذبحو علوش في العيد... و نهزو موسم لدار الانساب... نعملو سلاطة خضرة كيما قبل... و نعجنو خبزة... ناكلو عضيمة في الصباح باش تقويلنا في الهمة... زادا بينا الشي و الا كنا نشوفو فيها لازم قبل توا ولى كماليات... قال الراجل كماليات شنوا ؟

العضم كماليات؟ الفارينة كمايات؟ الطماطم و الفلفل و المعدنوس و الخ كماليات؟ ...

ما نفهمش في السياسة... اما نعرف الي الحكومة تتسلف مليارات زرقة باش تفرقهم على أتباعها أحسن ملي تعاون بيهم زوالي باش يشري ها الكماليات...

ما نفهمش في السياسة... لكن نشوف في ناس ركبت و دلدلت رجليها على تونس و ثورتها بعد ما بعنا اولادنا بالدم باش رجعناهم... باعونا بالمال باش يوجعونا...

ما نفهمش في السياسة. .. لكن دمعتي تطيح كيف نشوف مرا تلقط في الزبلة و تاكل... كيف نشوف راجل مريض يموت خاطر ما عندوش حق الدواء... كيف نشوف عايلة تبطل اولادها مالقراية خاطر ماعندهاش باش تشريلهم الكتب... كي نشوف صغار ما يعيدوش كيف اندادهم ... كيف نشوف ناس تسكن في الجبانة... كيف نشوف اولاد يرميو أرواحهم في البحر يا تخطف يا يموتو... كيف نشوف اولاد مازالو كيف النوارة تغسلت مخاخهم و مشاو بين السقين في "داعش" ...

ما نفهمش في السياسة. .. لكن نعرف الي اللحاسة في العهد البائد ما تبدلوش و مازالو يهزو في الفارينة في عهد الياسمين...

ما نفهمش في السياسة. .. لكن نشوف و نقرى في نسب البطالة إلي تكاثرت من نهارت الي قالو "هرمنا"...

ما نفهمش في السياسة. .. لكن نشوف في مخلوقات غريبة ما فاهمة مالحكاية شي تصك في "حارة" ملاين كل شهر فقط على تدفئة كرسي في المجلس...

ما نفهمش في السياسة. .. لكن نسمع في حديث الكبار على عهد الاستعمار قداش الناس كانت يد وحدة تدافع على كل حجرة في هالبلاد و نشوف فيهم توا كيفاش يهدمو فيها و كان يلقاو يفجرو و يكسرو كل حجرة في هالبلاد...

ما نفهمش في السياسة. .. لكن نشوف في الرشوة ريحتها عاملة مسد... و السرقة بابها زاد تحل في بلاصة ما يتسد... نشوف في ناس دينها فلوس تزيد في شهاريها بالملاين و تنقص في حق الياغورطا بالدورو...

ما نفهمش في السياسة. .. لكن نشوف في قلة حياء كبيرة باسم الحرية و الديمقراطية ...ما نفهمش في السياسة. .. لكن نشوف في ظلم كبير باسم الدين البريء منهم ليوم الدين...

ما نفهمش في السياسة... لكن غايضني حال بلادي الي داخل في الحيط... نشوفو في عوج كبير و نجمو نتكلمو لكن الكلام ما يفيد... مازال بارشا ما نقول و نحكي... من غير ما نستحق نفهم في السياسة ... الشي واضح و مفهوم .. وفى الحديث