ما نجّمتش نرقد

ما نجّمتش نقوم

لا نجّمت ناقف لا نجّمت نقعد

عينيّا وجعتني مالبكاء و قلّة النوم

كيفاش نرقد و في بلادي يقتلوا بالكرطوش؟

كيفاش نرقد و إلي لازمهم يفهموا ما فهموش

كيفاش نرقد و فما مجرمين يقتلوا بالسكاكن، بالغدرة

موش يقتلوا في مجرمين، يقتلوا فالقدوة، فالعبرة...

قتلولنا اقلب إلي يدق في بدن بلادنا

يحبوا يسكتونا، يفجعونا و يحرمونا من رجالنا

كل واحد مكبّش فالكرسي و يقول خاطيني

ماهمش حاسّين بتونس إلي قالت كهو يزّيني...

قتلوهم لا شفقة لا رحمة..

ألغام، سكاكن و كرطوش

نساو إلي الرجال، الشهداء ما يموتوش...

خلاوهم عرايا، مرميين و مذبوحين...

تي هو حيوان ما يعملهاش خاطرو حنين

حيوان و يفهم بالفطرة

هاذوما بالاسم عندهم عقل و جايبينها خبرة

الله يرحمك يا شهيد...

الله يصبرك يا أمو، يا بوه، يا أختو، يا خوه، يا صحابو، يا مرتو و يا خطيبتو

ما تبكيوش عليهم، تولدوا رجال، عاشوا رجال و ماتوا رجال و اسياد رجال...

ماتوا و خلاولهم الجاه، السلطة و المال...