و هوا في نكت البلادة يبرتاجي

ما حبش ينطق و هيا ما لقات بيها وين

قتلو عيدك مبروك بالغصة و الدمعة في العينين

جاوبها بعد مدة قالها علينا وعليك اشنية حوالك

ضحكت تنهدت و قالت في قلبها حال الكرموس في العديلة

حالتي تكرب و قلبي مليع و ما في يدي حيلة

نقلك الحقيقة نقول توحشتك و انت تعفس عليا

ولا نسكت و انت تسكت وتوفا الهدرة هذيا

نقلك عندي قداش نحلم بيك و في صحوي و منامي نشوف فيك

ولا نجاوبك "لاباس عيش خويا" و نكذب على روحي و عليك

تي انت روحي و غيرك والله ما تمنيت !!

فيبالك كي نقوم في الصباح نسالك اش نطيب

و نسمعك تجاوبني تقلي كي نشوفك كايني تعشيت

و نسالك اش نلبس تقلي كل شي يواتيك

تبوسني و تضحكلي هاك الضحكة من عينيك

و في الاخر نقوم من فرشي نكركر في شلاكتي نلوج عليك

نشوفك في المرايا

و نحس بيك تتحرك ورايا

تتعدى بحذايا و تقشعرني لمسة يديك..

نزيد نقلك ولا يزيك?

قال المفتي عيد الناس فرحت و انا بالغصة بكيت

علاش بكيت ?? خاطر حاجة اخرى تمنيت

تمنيتك اول واحد توشوشني تهنيني بالعيد

و تقلي كل يوم بشوفتي عندك عيد

تعطيني المهبة و تدللني كي البنية الصغيرة تعاملني..

تحب نحكيلك على حوالي ولا نخليها بستر العالي?