توا أنا نحب نعرف حاجة علاه راجل كي يعمل علاقة مع طفلة (تصوحيب، خطبة..)  ايحب يتحكم فيها في كل شي  يحب يمشيها و يجيبها على كيفو يحبها تتخلى على لمبادئ متاعها بش تسمع كلامو وبش تراضيه و هوا سي سيد تلقاه يعمل فلي يحب عليه و اكثر وهي قاعده تستنى فيه وقتاه اروح فللخر اروح احللها لكونت فايسبوك متاعها بطبيعه عاد عندو موت باس متاعها و يبدا الوج معا شكون حكات و شنيا حكات...

و بعد اقولها أنا عندي فيك ثيقة و هات ماك لاوي.. توا بلاهي فهموني كي عندو فاها ثيقة علاش يدخل الوج كلمهبول في الميساجات يلقاشي حاجة هكا ولا هكا برغم يعرف عندها حاجات خاصة هي و صاحباتها و ميجيش يقراهم راجل كيفو..

قال شنية إغير علاها و كي اغير علاها لازم هوا الي يسيرلها حياتها على كيفو كلعبيد لازم قبل ما تعمل آي حاجة تشاورو حتى حاجة تافهة لازم تشاورو ولا يعمللها عركه و يرودها خيانة و درا شنيه في وقت الي بوها ما حكمش فيها هكاكة خاطر يعرف بنتو شنيه ويعرف تربيتو كيفاه..

و كي تجي طفلة تقولو لا ما نعملش هكا و ما نحبش هكا ارودها راسها كاسح و معاندية و ما تصلحش...

أما ما جاش لبالو آلي طفلة هاذي شخصيتها قوية و الحاجة آلي ماهيش مقتنعة باها ماتعملهاش.. 

ما جاش لبالو  آلي طفلة هاذي عندها مبادئ تربات علاهم و مدفونين في قلبها و حد ماينجم ابدلهوملها.. 

ما جاش لبالو آلي طفلة هاذي عندها الحق تقولو لا على حاجة متحبهاش كيما تقولو إي على حاجة تحبها..

ما جاش لبالو آلي طفلة هاذي ما ينجمش يفرض علاها آلي يحب.. مللخر طفلة هاذي ما ينجمش يفرض علاها العيشه آلي يحبها هوا تعيشها..