لمْتَاشْ السْمَاحْ ؟
Safa Borji - صفاء البرجيلمْتَاشْ السْمَاحْ ؟
لمتاش الدَّمْ يڨطّر ؟
والأسياد بيه تتعطّر
الڨلب بغُلُّو معبّي
الدموع من الزوالي دفيڨَة
والأفاعي بسمْهَا تنهشْ في لحمُو الطايب مالوجيعة
ومن الفاضل في جْيُوبَا تعبّي
لمْتَاشْ السْمَاحْ ؟
لمتاش السماحْ و الخبثْ من فعايلهم فاحْ
بيّاعة كلامْ و المُكْرْ متدرّڨْ في الأفّام
لا خيرْ في اللّي مسامحْ ولا في اللّي مخلّي على فمُّو كْمَامْ
لمتاش المخ مالتخمام ينوسْ
على سارق البلاد المنجُوسْ
والطَّحّانة اللّي شَابعة في كفُوفَا بُوسْ
لمتاش الڨلب يدسْ في ليعاتُو
والعيونْ مَغْصُوصَة تشيّع في وجعاتُو
من وَسْخةْ الفسَّادْ
وسكاكنْ الجَلاَّدْ
واللِّي في جُوعُو شَايفها لُقْمَة الفرحة في هالبْلاَدْ
لمْتَاشْ السْمَاحْ ؟
لين يشبع الحُكَّام ؟
لين تولّي ضربة الماتراك وشامْ ؟
لين تكثر سلاسلهم ؟
حتّى ترضخ لعميالهم ؟
حتّى يستانس الرّاس بالتطبيسْ ويصبح سيدكْ البُوليسْ ؟
وحقْ ربِّي والعبَادْ
وحق عزّةْ هالبلاَدْ
ماعادْ فيهَا سماحْ ...
بقلم صفاء البرجي
Website Design Brisbane