بنية صغيرة ؛ فقت نلقى دنيا كاسحة و هموم ياسر كبيرة ؛

نلقى ناس عندهم ضو و ماء و ناس حرم عليهم حتى يتنفسو الهواء ؛

ناس عندهم بَنيْ كبير و كياس ؛ و ناس الهم على ظهرهم أكداس ؛

ناس يمشييو للمدرسة كل يوم ؛ و ناس ما يمشِيوش ؛ موش خاطر غلبهم النوم ؛ خاطر بين دارهم و المدرسة مسافة في طول ألفين سلوم ..

فقت نلقى ياسر ظلم ؛ ناس تسافر لاخر الدنيا ؛ و ناس محرومة حتى مالعلم ؛

ناس تقرى بالملاين و ناس معندهاش مكتب و قسم ..

قيت ناس مايعرفوش أشمعناها شدة و غصرة ؛ و ناس مقاتش باش تشري الكسرة ؛

ناس حايرة من دبشها كل يوم شتختار ؛ و ناس عايشة مع الحلوف و الفار ؛

ناس تحكي و تتكلم ؛ و ناس باقي موش فاهمة أشنوة صار ..

قييت الي متهني و صغارو حذاه ؛ و الي هايم حتى حد معاه ..

قيت دارنا كي تصب الشتاء علينا تقطر ؛ قيت شطر خبزة تعشينا و تفطر ؛

قيت بابا راسو شاب علينا و موش ملحق ؛ و قيت ناس تشوف في هذا الكل و تصفق ..

قيت ناس تحقرك خاطرك زوالي ؛ و ناس تضحك على لبستك و تقول مسكين كي البوهالي ..

قيت روحي معنديش الحق نتكلم ؛

قيت حكومة ناسيتنا ووزير فينا مسلم ؛

قيت روحي لا نجم نقرى لا نعيش لا نتعلم ؛

قيت روحي ساعات مجبورة في كل شي نسلم ..

قيت روحي موش كي أندادي ؛ مدام أمي موش حذايا بين الأجبال ادادي؛

قيت ماعندي كان ربي هو زادي و زوادي ..و ليوم مشيت نقرى كي العادة أما شرايكم في الي صار يا سادة ! ..

قيط 'بوط ' على طاولتي مزينو و محلاه ؛ حبيت نبوس و نحمل طاطا و لا سيدي الي شراه ؛ لونو كي لون الفرحة مَبهاهْ.. أي بجدي متضحكوش عليا !! هو صحيح بوطْ مش نلبسو في ساقيا ؛ أما بيه انجم نشق الطبعَة نمشي نقرى و نفرح والديا ؛ هو البوط الي مش يخليني نعفس عالحجرة الي تعثرني في كل ثنية ؛ على بو والدين الفقر الي مكبش فيا ؛ على سنين الهم المتكية على ضهري تقسم فيا ؛ عالدنيا الي رِكْبتلهَا باش تكور بيا .. هو جرد 'بوط' بالنسبة ليكم أما شوفو قيمتو في عينيَا ...